Memorieboek der stad Ghent van 't jaar 1301 tot 1793. Deel 2

1528.

Commissarissen.

Mijn heere Jacques van Luxembourg, heere van Fiennes.

Philips, heere de Lalaing, over den grave van der Hoochstrate.

Maximiliaen van Hornes, heere van Gaesbeke.

Jacques de Lombise, heere van Castre.

's Heeren kiesers.	Der stede kiesers.
Mer Willem de Wale, ruddere, heere van Axpoele.	Pieter van der Zwalmen.
	Willem de Ruddere, d'aude.
Meester Reynier de Donckere.	Meester Willem Fransman.
Gillis de Baenst.	Jan de Vettere, f^s Heyndricx.
Claeys Damman.
Schepenen van der Kuere.	Schepenen van Ghedeele.
Mer Jan van Saemslacht, ruddere.	Loys de Wale, ghezeit van Axpoele.
Pieter Teerlync.	Gyselbrecht van den Eede.
Lievin de Voghele.	Denijs Vlamync.
Jan Pascharis.	Jan Heyman.
Christoffels van Hove.	Lievin van Beke.
Anthuenis Zoete.	Gillis de Brune.
Lowijs Bette.	Jan de Grutere, f^s Jacobs.
Meester Lievin Heyndricx.	Gillis van den Huffele.
Joos de Vechtere.	Pieter van Melle, f^s Jacobs.
Gillis Diericx.	Joos de Croock.
Willem Cochuut.	Jan van den Brande.

[p. 74]

Fransoys Everwijn.	Pieter de Schuutere.
Anthuenis van den Damme.	Jacob Senay.
Heuverdeken.	Deken van de Weverie.
Lievin Pien.	Jan Rijckaert.

Item, in dit jaer was de beelgie van Onser Vrauwe van Lede, ende beede de keysers met den tabernakele, voor de Keyserpoorte ghestelt.

Item, in dit jaer was de papieren-watermuelene voor de Keyserpoorte ghestelt, by eenen Pieter de Keysere, boucbindere op de Verhildeplaetse.

Item, in dit jaer was ghedincht in de nieuwe vierschare van der Keure, ende daer was inne verwijst eenen Lievin Inghelbrecht ende onthooft op de Hoofbrugghe.

Item, in dit jaer was de jonghen ghulde van Sente Sebastiaen in Sente Jacopskercke, by colatie van den ghemeenen insetenen, gheconsenteert ende ghegheven den Minnemeersch an Sente Jacops Brugghe, omme ten eeuweghen daghe huerlieder scuttershof te zyne, zonder daer jemant tjeghens te moghene segghen, 't sy gheburen oft andere.

[In dit jaer was eene waellinne, ghenaemt Jannette, ghedolven, omme dat zy haer kindt vermoort hadde. (Pr. Ar.^B.)

- Den xx^en Martij was Catelyne van der Muelene ghedolven, omme dat zy huer kindt versmoort hadde in een aysement. (Pr. Ar.^B.)

- Den xxv^en July was Jacob Keymuelen, rietmakere ghewesen te knielene voor scepenen, ende bidden vergheffenesse, ende commen blootshooft, baervoets in zijn lywaet, met eender tortse in zijn handt, totten pelleryen, aldaer hem afgheberrent was al zijn haer, ende een gloyende cruuce up zijn cake ghebrandt ende ghebannen vijftich jaer uut Vlaenderen, ende dat op den stake, omme dieswille dat

[p. 75]

hy gheseyt hadde dat in 't Sacrament van den aultare niet meer macht en was dan in het brood van zijnder schaprade, dat men Onze Vrauwe niet en behoort te anbiddene, ende dat de messe die de priesters doen over die doot zijn hemlieden niet en proufficteren, maer alleenelick proffycteren den priester. (Pr. Ar.^B.)

- Joos de Backere, ruddere, was t' Sente Pieters ghepellerijnt ende zyne tonghe duersteken, ende moeste draghen een jaer lanck gheduerende op zijn rechte mauwe een roode cruuse, ende drie sondaghen in de processie t' Sente Pieters draghen t' elcken eene tortse. (Pr. Ar.^B.)

- Den xij^en December was ghewesen een persoon van Poperinghe die ghevanghen was van den souverain in 't casteel, dat hy tsachternoens sterven saude, ende hadde by hem broeder Gheertkin van den Augustynen, zynen biechtvadere, ende tsnoenens naer de maeltijdt begeerde hy papier ende int omme zijn testament te scryvene, ende als broeder Gheertkin daer omme ghynck, de pacient sloot de duere toe ende daer en mochte niemant inne; ende de souverain bat hem dat hy de duere open doen saude, hy en saude niet doen sterven voor 's dijssendaechs, 't welcke de pacient gheloofde ende dede daer uppe de duere opene; maer de souverain en hilt zijn woordt niet. (Pr. Ar.^B.)]