Memorieboek der stad Ghent van 't jaar 1301 tot 1793. Deel 2

1529.

Commissarissen.

Meester Charles Claissone, raed ordinaire der K.M. enz., over mynen heere den gouverneur, grave van Gavere.

Philips de Lalaing, over den grave van der Hoochstrate.

Maximiliaen van Hornes, heere van Gaesbeke.

Jacques de Lombyse, heere van Castre.

[p. 76]

's Heeren kiesers.	Der stede kiesers.
Roelant de Baenst.	Jan de Stuvere.
Gyselbrecht de Grutere.	Jacob van Melle.
Simon Bette.	Claeys de Voghele.
Jan Claeys.	Gillis Zagherman.
Schepenen van der Kuere.	Schepenen van Ghedeele.
Adriaen Bette.	Lievin Borluut.
Jan Rijckaert.	Jan de Peystere.
Claeys Damman.	Jacob van der Beke.
Meester Jacob van den Eechaute.	Jan de Vos, f^s Adriaens.
	Lievin dHooghe.
Claude Goetghebuer.	Ywein Slock, f^s Jooris.
Bauwin de Buck.	Antheunis de Luu, f^s Mer Anthonis.
Bertelmeeus van Leyns.
Jooris de Keystere.	Lievin Hueribloc, f^s Jacobs.
Denijs Teerlync, t' Sente Baefs.	Joos van Hauwaert, f^s Pieters.
Lievin van der Boven.	Jan Verrekin.
Lievin van Huerne, d'aude.	Cornelis van der Zwallemen.
Jan van Impe, in den Appele.	Jan Raes, te Putte.
Jacob Deynoot.	Jan Fieraert, by den Bogaerde.
Heuverdeken.	Deken van de Weverie.
Lievin Pien.	Lievin de Voghele.

Item, de pays die ghemaect was te Madriel tusschen den keysere, grave van Vlaenderen, ende den coninc Franchoeis van Vranckerijcke, op den xiij^en in Lauwe xv^cxxv, op eenen sondach, was binnen der stede van Camerijcke gheapprobeert ende generalic ghemaect by mevrauwe 's conincx van Vranckerijcke moedere, den coninc Franchoeis zelven ende den coninc van Navaerne ende zyn coninghinne, 's conincx van Vranckerijcke sustere, met meer edelen over een zyde, ende mevrauwe Margriete, 's keysers moeye, de grave van Ghavere, heere van Fynes, gouverneur van desen lande

[p. 77]

van Vlaenderen en van Artoeys, met meer edelen, over d'ander zyde, daer een groote tryomphe over beede zyden bedreven was.

[In dit jaer regneerde de siecte die men hiet de Sweetende Siecte, daer vele menschen af storven. (Pr. Ar.^B.)

- In dit jaer was by die van den rade in Vlaenderen een manspersoon ghecondempneert ghesoden te werdene, ende zyne medeghezellen ghehanghen an een potence, up Ste. Pharahildenplaetse, omme dat zy valsche munte ghesleghen hadden. (S.G.)

- Den xj^en Juny was Pieter Ondermaerck, curdewanier, ghewesen t' oncleedene totter gurtrieme, zijn haer afghecurt, een scroode voor 't hooft ende ghegheesselt totten bloede, ende commen also tot up den Coorenaert, voor den Bonten Hert, op een schavaut, daer hem anne ghehanghen waren diverssche briefven, ende wert van danen ghegheesselt tot in 't Sausselet. Item, tsanderdaechs was hy wederomme brocht op 't selve schavaut ende wart daer naer ghestelt up eenen waghene, ghebonden an eenen stake, ghegheesselt ter Mudepoorte ute ende ghebannen vijftich jaer, beter uter stede dan daer inne, omme dat hy in diverssche plaetsen brieven ghestelt hadde in verminderthede van den gheestelicken state. (Pr. Ar.^B.)

- Item, Jacob de Meyere was ten selven daghe gheseyt te gane ten Heleghen Bloede ende vallen up zyne knien ende bidden scepenen vergheffenesse ende moeste draghen eene tortse t' Sente Clare, achter de Vrindachmaert, omme dat hy gheseyt hadde jeghens 't slot van der colatie angaende 't scuttershof op de Minnemeersch, ende seyde alsoude 't hem zijn lijf costen, dat zy 't niet ghebruucken en sauden. (Pr. Ar.^B.)

[p. 78]

- Den xiij^en December was overgheleet Jacob Feron, stedehaudere van den souverain, ende was den xvj^en December ghewesen te gane an Onse Vrauwe de Clery ende gheven xx duusent coreelen ende bidden vergheffenesse. (Pr. Ar.^B.)

- Item, in dit jaer, den xx^en in Wedemaent, was gheboren de jonghen prince van der Verckensmaert ende dolphijn van de Camerstraet, potentaet van den Vrydachsmerct, dominateur van der Langhermunte ende raedsheer van 't Plaetseken, ende was kersten ghedaen met grooter ghenoughten ende triumphe, ende was ghenaemt Nabucodonosor. (K.M.)

- In dit jaer, ontrent St. Martens-dach, was er een soo groote inondatie van water in Hollant, Zeelant ende Vlaenderen, dat op somighe plaetsen het water stont een mans lengde hooch boven de dijcken. (K.M.)

- In dit jaer quam de keyser Karolus te Ghendt, daer hy wel bleef vijf of zes maenden, midts den grooten watere, ende eenen leghbundinck hoys gholt x oft xij scilde, ende vertrack de keyser, ontrent Sinxen naer Spaengen. (S.G.)]