Memorieboek der stad Ghent van 't jaar 1301 tot 1793. Deel 1

[p. 358]

1491.

's Heeren kiesers.	Der stede kiesers.
Geeraerd van der Hoeyen.	Fransoeys van Coppenhole.
Jan de Crane, d'oude.	Jan van Hoorenbeke, cnape van de neeringhe.
Joos de Jaghere.
Gillis van den Broucke.	Hubert van Lueribrouc, deken van de weverye.
	Jan de Vos, buuten Posterne.
Schepenen van der Kuere.	Schepenen van Ghedeele.
Daneel Sersanders.	Joos van den Berghe.
Jan Vlaminc.	Race van den Heede.
Pieter Goetghebuer, f^s meester Pieters.	Pieter van den Schoete.
	Meester Philips de Grutere, f^s Boudijns.
Gillis van den Eechaute.
Jan de Brun.^1	Andries de Muenc.
Jan van der Asselt, drapier, by Ste. Jans.	Jan van den Haute, hudevettere.
	Gillis Passcharis.
Jeronimus van Cuelne.	Lievin de Vos, voor Galileen.
Pauwels Dullaert, goudsmet.	Anthonis Deynoot, f^s Victors.
Arend Steppe.^2	Symoen van Leeuwen, f^s Heindricx.
Symoen de Caluwe, sceepmakere.
	Jacob van der Haghe, f^s Augustinus, scipman.
Roegier de Vettere.
Jacob de Grave, up de Mude.	Jan van der Brugghe, t' Ste Baefs.
Pieter Utendale, an den Groenen Briel.	Zegher Ghijs.
Heuverdeken.	Deken van de Weverie.
Jan van Coppenhole, over hem Willem van Ste. Jacobs.	Joos Steel.

1 Jan de Bru. S.B.

2 Over hem Jan van der Looren. S.B.

[p. 359]

Item, in dit jaer was 't casteel te Hoedonckt met crachte ghewonnen van die van Ghent, met grooten assaute, ende verbrant.

[In dit jaer, den xiij^en in Sporcle, zo was 't casteel te Hoedonc ghewonnen van die van Ghendt met macht, ende daer was uppe als capiteyn Jan, de broedere van den heere van Nevele (Pr. Ar.^B.) ende Jan Denijs, schipman, ende was corts daer naer onthooft. (K.M.)]

Item, up den xvij van Lauwe trocken uut Ghent vj oft vij^c ghesellen van oorloghe, ende waren alle ghetrauwe, ende hadden diversche capiteynen, te weten: Jacob Rijm, Bertelmeus Bollaert, Jan Denijs, Jan Laxaut, Bolleken, Jan Roobaert, de Bruselare, ende met hemlieden diversche mannen ende ruters, ende zy trocken up eender nacht voor Dicxmude ende wonnen 's nachs de stede up 't ijs van den nacht, ende men wiste te Ghent van hemlieden gheen tydinghe voor dat zy in Dicxmude waren, ende hadden 't ghewonnen.

Item, up den xxj in Lauwe slouch men te Ghent een trompet dat hem alle mannen zauden ghereet maken van buuten ende binnen, omme met den capitein te treckene, ende hemlieden ontset te doene.

Item, als die van Bruggheende dlant volc wisten dat zy in Dicxmude waren, quamen met grooter macht, ende beleyden Dicxmude omme weder te ghecryghene, ende waren wel vj^m sterck; de ghesellen van binnen, ziende dat zy zoo beleyt waren zonder t' hebbene secours binnen vij daghen daer naer, maecten jeghens de ruters apoeintement ende met de heeren die voor de stat laghen, uuten Westquaertiere, zoo dat zy quyte gaen zauden vry te Ghendewaert met

[p. 360]

huerelieder wapene; maer gheenen buutinck mede draghen up 't lijf; zy hadden de wet vermaect ende vele zaken ghestelt, maer moesten daer weder uutscheeden.

[Den 1^en Halfvastendach wonnen die van Ghendt Gheersberghe, ende verberrenden 't veele ende vynghen den heere van Boulare die groot rentsoen gaf. (Pr. Ar.^B.)]

Item, in 't zelve jaer was Sente Lievin t' Hautem ghedreghen, ende van daer commende bleven up de maert staende metten heleghen sant, ende alle de nerringhe met hueren banieren up de Vrydachmaert.

Item, in dit jaer ende scependom was Remeeus Hubert te Ghent jeghens over 't Scepenhuus in 't straetkin doot ghesleghen van de ghemeente van Ghent, daer de capitein Plouch cause af was, ghemerct dat hy hem bevonden hadde contrarie zijnder belofte.

Item, Jan van Coppenhole ende Franchoeis zijn broedere waren beede ghevanghen ende ter justicie brocht up een scavaut ende up eenen achternoene onthooft, die wonderlicke zaken te kennen gaven, ende zy waren beede up een uere ghebooren ende storven beede up een uere, ende waren beede in een graf gheleit, up Sente Verhilden-kerchof.

[In dit jaer wart doot ghesmeten Hubert van Luerebrouck, deken van de weverie, ende zyn cnape van den Curten Sweerde, ende in zyne stede quam anne Joos Steel, filius Inghelrams. (Pr. Ar.^B.)

- Den xiiij rees eene wapenynghe, ende daer wart doot ghesmeten Remeeus Hubert, capiteyn van Ghendt gheweest, ende daer werden ghevanghen Jan en Franchois Coppenhole, de bailliu van der Auderburch, ende worden onthooft up de Vrindachmaert. (Pr. Ar.^B.)

[p. 361]

- Gillis van den Broucke was een jaer gheseyt in huus te sittene, ende jeghens niemant te sprekene dan jeghen zijn wijf ende kinderen, ende voort moeste hy doen maken het Paddegat, also hy dede terstondt. (Pr. Ar.^A.)

- Item, 's nachts naer dat Remeus versleghen was, was men uytte om de stede in te nemene, maer Godt versach by mirakelen, ende curt daer naer wart peys, Godt lof. (K.M.)

- Item, in dit jaer worden ghebannen Jacob Die-'t-al-doet, Willem de Vleeschauwer, Joos van Hijssche, Jacob van Basselare, Jan van der Breemt, ende meer andere (K.M.)

- Up den v^en Augusti dede men den voetval van den payse in den persoon van den hertoghe van Sassen, ende hy wart al Vlaenderen duere uutgheroupen up Vincula Petri. - De pays was ghemaect den xxx July te Cassant; de pays was uutgheroupen den xj^en Augusti. (Pr. Ar.^B.)