Memorieboek der stad Ghent van 't jaar 1301 tot 1793. Deel 1

1487.

Schepenen van der Kuere.	Schepenen van Ghedeele.
die anquamen den iiij in november.
Mer Adriaen Vilain, ruddere, heere van Resseghem.	Pieter van den Moere.
	Pieter van Hauwaert.
Jan de Pic.	Augustin Seyssins, f^s Daneels.
Jacob de Cooman, in de Camerstrate.	Joos Passcharis.
	Heynric van Leeuwen.
Geeraerd van Anghereel.	Jacob Impins.
Jacob van den Hulle.	Jan Vernadelin.
Olivier Vaenkin.	Joos de Bake.
Jan Rufelaert.	Jan Damman, f^s M^e Jans.
Willem van der Burch.	Rogier de Tolleneere.
Jan de Vos, buten Posterne.	Jan de Backere, tapijtwevere.
Andries Tienpond.	Jan van Kerrebrouc.
Joos van der Haghen, in de Camerstrate.	Fransoys Boele.
Jan van der Hasselt, muelenare, up den Corenaert.
Jan de Brauwere.
Heuverdeken.	Deken van de Weverie.
Pieter Gyselins.	Lievin de Moor.

[Item, dese weth was ghestelt sonder kiesers ende sonder commissarissen den iiij Novembris xiiij^clxxxvij. (K.M.)]

- Item, den xx in Lauwe quamen die van Brugghe ende

[p. 349]

die van Ypere te Ghendt in ambassaten, ende vertrocken den xxiiij in Lauwe. (K.M.)

- Item, den 1 in Sporkele daer naer was het ghelt te Ghendt ghestelt: den Andriesgulden op vj schellynghen vier grooten, de Sent Jangulden v schellynghen grooten, den dobbelen met de twee leeuwen vj grooten, ende den copenholle iiij groote. (K.M.)

Item, in dit jaer was 't eenen grooten brant t' Sente Baefs by Ghent up eenen saterdach den xv^en Septembris, ten tien ueren voor de noene, ende daer verberrenden bet dan hondert huusen.

Item, in dit jaer was ghevanghen Mer Mathijs Pehaert, die van den hertoghe Macximiliaen, voor 't Hoochuus te Ghent, rudder ghesleghen was, ende was te Ghent inne brocht, ende waert onthooft ende ghequaertiert; zijn hooft up eenen schacht ghestelt ter Brugschepoorte uute.

[In desen jare, den 1 dach van February, die van Brugghe maeckten eenen oproer ende namen ghevanghen Maximiliaen, roomsch coninck, hunnen souvereynen prins, ende veel andere edellieden, die gheleedt wierden naer Ghendt, maer de prins bleef tot Brugghe, alwaer oock ghevanghen wiert Mher Mathijs Pehaert, ridder, eersten grooten deken van Ghendt, die naer Ghendt gheleedt wiert, alwaer hy onthooft ende ghevierendeelt wiert, ende sijn hooft ghestelt op de Walpoort, als eenen verrader. In dit selve jaer wierden secretelijck onthooft neghen heerelijcke persoonen, door last van den heer van Rassengien. (K.M.)]

Item, den eersten dach van Sporkele liepen die van Brugghe in de wapene ende vinghen den hertoghe Macximiliaen, rooms coninc ende noch ix oft x heeren (ende leyden up

[p. 350]

Cranenburch. Pr. Ar.^B.), ende hilden hem langhe ghevanghen.

Item, die van Ghent dit verhoorende trocken naer Brugghe, ende die van Brugghe leverden hemlieden die heeren die zy ghevanghen hadden, ende zy brochten die naer Ghent, die zy leyden ghevanghen in 't Gravensteen ende dedense bewaren up de verbuerte van lyve ende goede, ende by hemlieden lach boven om te bewaren eenen Arent van Wettere, ende beneden laghen noch xiiij mannen, ende de voornoemde Arent van Wettere hadde dicwils boven ghescil jeghens Remeeus, die altijts de heeren dooden wilde, ende quam somtijts met eenen priestere ende den scerprechtere, welcke die voornoemde Arent vromelic wederstont, zoo dat men se in 't ende sceeden moest by scepenen van beede de bancken.

Item, die van Ghent sonden naer Brugghe vele notabele by den coninc van den Romeynen om een gheselscip te haudene ende hem te troostene in vanghenesse in 't huus van Minheere Ferry de Groos, heere van den Nieuwelande, by der Eselbrugghe, ende daer was ghemaect eenen paeys generael. Maer als de coninc uut vanghenesse quam zoo en duerde de paeys niet langhe; want de keyser Frederic dede alomme rooven ende branden, vanghen de aerme lieden, niet jeghenstaende dat Minheere Philips van Cleve, heere van Ravesstein te Ghent ghesonden was in ostagien voor 't vulcommen van den paeyse.