Memorieboek der stad Ghent van 't jaar 1301 tot 1793. Deel 1

1481.

Commissarissen.

Mijnheere de prelaet van den Dunen.

Mer Jan van Nieuwenhove, ruddere.

Dieric van der Gracht.

's Heeren kiesers.	Der stede kiesers.
Lodewijc van Maerke.	Jan van Coppenhole.
Jan Lanen.	Martin van den Buendere.
Jan van den Wijncle.	Joos van Wijchuus, deken van de Weverie.
Willem van Meerhaute.
	Jan van der Boven.
Schepenen van der Kuere.	Schepenen van Ghedeele.
Mer Adriaen Vilain, ruddere.	Willem Bette.
Jan van den Abeele.^1	Joos van der Eeken.
Geeraerd Goetghebuer.	Jan Dullaert.^3
Daneel Onredene.	Jacob de Grutere.
Arend Mast.	Jacob de Cooman.^4
Lievin de Groote.	Jan de Peystere.
Joos van den Berghe.	Geeraerd van Anghereel.
Jan de Wilde.^2	Hubert van Lueribrouck.
Jacob van Papeghem.	Lievin Deynoot.
Justaes Schietecatte.	Jan van der Asselt.^5
Lievin de Voghele.	Joos de Brune.

1 Jan van den Abeele, smet. S.B.

3 Jan Dullaert, mersenier, S.B.

4 Jacob de Cooman, f^s Jans. S.B.

2 Jan de Wilde, olislaghere. S.B.

5 Jan van der Asselt, up t' Sant. S.B.

[p. 321]

Willem Doedins.	Martin van Eertbuer.
Joos Steel.	Lievin de Sceppere.^1
Heuverdeken.	Deken van de Weverie.
Jacob van Wymeersch.	Arent de Cleerck.

Item, in dit jaer was torreken ghemaect up de Leye, van Jan van der Schaeghen hove, by Alins hospitael.

Item, in dit jaer was gheboren te Brusele, den x van Septembre, eenen jonghen sone van vrauwe Marye, ghenaempt Franchoeys; maer hy starf jonc.

Item, in 't voornoemde jaer stont tusschen beede den Scepenhuse van der Kuere ende van Ghedeele een groote myte met vasseelhaute, daer up dat vonden was een groote rolle van zes bladeren pampiers vul ghescreven, sprekende up den voorscepenen ende die van der wet ende den hueverdeken ende ander offichiers der stede, ende also stont de stede van Ghent in perykele van groter onghenouchte.

Item, in 't selve jaer trocken de Jacopynen uut Ghent ter causen dat zy ghepreect hadden ende zeyden datter ongheloveghe binnen Ghent waren, ende daer was by ghemeene colatie ghesloten ende gheseyt dat men hemlieden verbieden zaude al dlant duere huerlieder statie ende huerlieder ghoetdoen, ende 't selve was also verboden binnen der stede met eenen trompette.

Item, up den dicendach den xxiij^en Octobris, was met eenen trompette verboden dat niemant ter Jacopynen gaen en saude up de boete van xx l. gr., noch hemlieden gheen ghoet doen up de zelve boete. Up de zelve weke 's vrydaechs

1 Lievin de Sceppere, witledertouwere. S.B.

[p. 322]

was eene joncvrauw, in de Posterne wonende, ghebannen uut Vlaenderen, omme dat zy ten Jacopynen ghync ende quade woorden sprac anghaende de regierders van der stede, ende dat in huerlieder presentie.

[Item, in t' zelve jaer was Meester Jacob Weits, doctuer ten Preecheeren om zijn predicatie, gheleet ten huuse van meester Michiel Varmachtilt, prochiepape van Sente Niclaus, aldaer hem te bewaerne hadde Heindrick de Sceppere, neghen daghen ende neghen nachten, ende was betaelt van der stede weghe, ende van danen was de voorseyden Weits gheleet by den deken van den Kerstenhede, ende meester Michiel voorseyt up Sauselet, daer hy lach 28 daghen, bewaert van den voornoemden persoon; coste der stede 32 sc. gr. Actum den 9 July. (Pr. Ar.^A.)]

Item, up eenen dycendach den xj Decembris was te Ghent ghebannen Minheere van Gaesbeke, een van den meeste heeren die in 't hof van den prinche was, vijftich jaer, uut Vlaenderen, omme dies wille dat hy gheseyt hadde dat de lieden van Ghent waren honden ende muytmakers, ende hy hadde gherne den prinche Macximiliaen jeghens.... ende een afscheedinghe ghemaect van die van Brugghe, ende dese heere lach langhe ghelogiert, naer dat hy ballinc was uut Vlaenderen, te Brugghe, by dewelcke dat een groote onghenouchte ghecommen zaude hebben tusschen Ghent ende Brugghe; ende terwylen dat de voornoemde heere ghebannen was, de stede stond zonder hoochbailliu vij weken ende drye daghen ende noch ix daghen; ende aldus stondt de stede zonder hoochbailliu viij weken ende vijf daghen.

Item, in dit jaer was minheere van Daeysele, ruddere, hoochbailliu van Ghent, t' Antworpen doot ghesleghen van

[p. 323]

den heere van Montengy, up den xx^en Octobris, ende was in Ghent brocht by avonde met grooten rauwe, ende men luyde in alle kercken.

Item, minheere van Gaesbeke was te Ghent erghebannen 's donderdaechs in de half vastenweke, vijftich jaer uut Vlaenderen, ende doen hadden de drye leden vergadert gheweest omme dat se den heere van Gaesbeke appeleren wilden, maer bevonden dat se danof te gheenen apeele en stonden.

Item, vrauwe Marye overleet deser werelt ter salegher memorie te Brugghe, up den xxvij^en in Maerte, ontrent twee ueren naer noene in de Paesdaghen, ende doen ghinc de wet van Ghent met schoonen state te Brugghe, ende men seyde d'een vrient tot den anderen: ‘Wie met der wet trecken wilde die zaude zijn costen hebben, ende dat elc secretelic voorsien ghaen zaude also hy zijn lijf avontueren wilde.’

[Den 25 van Maerte 1481, stierf vrouwe Marie door den val van haer peert, rydende ter jacht, ende wert begraven tot Brugghe. (K.M.)]

Item, vrauwe Marye overleden zijnde was begraven te Brugghe in de canesye van Onser Vrauwen, in den hooghen coer.

Item, als die van Ghent commen waren in Brugghe in huerlieder herberghe, ende de prinche dat verhoorende, dede ontbieden die van Ghent oft hemlieden believen zaude te commene tot hem in zin hof, ende gaven in antwoorde dat zy daer niet commen en zauden, ten ware dat zy hadden saveconduit van den prinche, ghemerct dat Mer Jan van Daeysele, hoochbailliu van Ghent, t' Antworpen by hem ontboden was te commene ende was daer op den ix Octobris

[p. 324]

doot ghesleghen ende deerlic vermoort by nachte naer de maeltijt daer hy t' sijnder herberghen gaen zaude, ende de prinche en hadde van dien feyte gheen corecxie ghedaen, dat onslieden van Ghent wonder gheeft, ende also secht den prinche wy zijn tot zynen dienst, maer ons en ghelieft noch daer niet te commene dan up 't voorseyde saveconduit.

Item, de heeren van den prinche droughen over de andwoorde ende 't advijs van die van Ghent, ende de prinche ontfync de andwoorde minnelic ende hy consenteerde dat men alle de dueren ende veinsteren van zynen hoove uut den haeck werpen zaude, ende dat die van Ghendt de zelve doen bewaren zauden in huerlieder name ende also hemlieden dat goet dincken zaude.

Item, de heeren van Ghent dit van den prinche verhoorende, zy trocken te hoove met schoonen state by hueren prinche, daer de deken van de Witte Capproenen met zynen ghesellen wel voorsien, by laste van den prinche de dueren ende veinsteren bewaerden, ende terwyle dat die van Ghent jeghens den prinche spraken, daer grooten druc ende rauwe bedreven was omme de doot van der princhesse, ende als zy daer gheweest hadden een groote uere ofte daer ontrent, trocken die van Ghent weder in haerlieder herberghe, ende de prinche besant hemlieden met twee pypen rijnsche wijn, ende minheere van der Gruuthuuse scanc ooc hemlieden een pype wijns, ende die van Brugghe sconcken ooc den wijn, ende aldus waren zy ontfanghen te Brugghe, ende waren daer zes of zeven daghen tot dat zy de wet van Brugghe vermaect hadden.

Item, dit aldus ghedaen zijnde quamen met den prinche te Ghent, met schonen state, alle in den rauwe, ende de

[p. 325]

prinche sat up zijn pert met eenen langhen swarte abyte ende een heycke met eenen raucapproen, zoo dat men zijn aensichte niet zien en mochte, ende binnen Ghent zijnde, waren in alle de smalle steden de wetten vermaect, ende alle baillius ende meyers die in den name van den prinche dienden, zonder de wet van Ghent die bleef dienende tot Halfougste.

Item, in dit voornoemde jaer waren te Ghent ghebannen drye rudders: minheere van Merrendre, minheere van Praet ende minheere van Dutsele, omme dieswille dat se huer uuterste vermoghen ende groot devoer deden, omme die van Ghent te vermakene jeghens den prinche ende omme hemlieden in twiste ende discoorde te hebben met Brugghe.

Item, sondach voor Sente Jansdach middesomere, brochten de lieden van den Sandberch t' Sente Baefs eenen fiertere, die schoene ende costelic was, ende gaven ter eeren van Sente Lievene.

Item, in dit jaer was de nieuwe camere van den Scepenhuse van der Kuere beghonnen te makene daer men in cameren dingt.

[Item, den 4 July was den eersten steen gheleyt van der nieuwer camere daer men inne dyncht, daer was onder den eersten steen gheleyt een gauden croone. (Pr. Ar.^A.)]

Item, Jacob van Wymeersch was ontfanghere van der stede van Ghent, Jan de Mey was deken van sijnder nerringhe ende bailliu in soldere, Jan de Vechtere was deken van de Curte Sweerden. Dese persoonen met meer andere met hemlieden ghevoucht ende overeen ghedreghen officie van der stede te hebbene t' hueren wille, ende zy hadden gherne t' hueren adcorde ghehat Jan van den Bundere, die

[p. 326]

doe hueverdeken was; maer hy en wilde hem in 't zelve stic niet voughen, waer omme zy onderlinghe veel rude ende leelicke woorden hadden.

Item, de hueverdeken met den heere droughen de zake an Scepenen van der Kuere, waer omme de voornoemde persoenen ghewijst waren verlaten te syne van huerlieder officie ende voort ghewijst onhabil nemmermeer officie te bedienene.

[Item, in dit jaer munte men te Ghendt de Andriesen ende de penninghen metten twee leeuwen van vijf grooten stick. (Pr. Ar.^A.)

- In dit scependom waren ghezonden ende gheordonneert by de drie leden 's landts van Vlaenderen seker ambassate, de welcke reysde by den conynck van Vranckerijcke omme pays te maken; maer zy en dede niet, ende binnen dier tijdt was den conynck Aryen overghegheven zonder slach of stoot, met alle de angienen die daer bleven waren van de Blangijssche reyse. Op Ste. Jansdach in de Kerstdaghen starf grave Franchois te Bruussele. Hier was dieren tijt in 't landt: het coorene galt te Brugghe xxiiij sc. gr. thoet, ende de rogghe te Ghendt xxx sc. elc halstere, ende de taerwe xliiij sc. elc halstere. (Pr. Ar.^B.)