Memorieboek der stad Ghent van 't jaar 1301 tot 1793. Deel 1

[p. 307]

1478.

Commissarissen.

Mijnheere de prelaet van den Dunen.

Mijnheere de prelaet van Ste. Baefs.

Mer Wouter van der Gracht, heer van Volanden.

Mijnheere van der Zoeterstede, bailliu van Ghend.

's Heeren kiesers.	Der stede kiesers.
Willem van der Cameren.	Daneel Claus.
Gillis Utenhove.	Jan van Coppenhole.
Gyselbrecht de Lu.	Martin Linesone.
Jacob Annaert, f^s Symoens.	Daneel Utendale.
Schepenen van der Kuere.	Schepenen van Ghedeele.
Mer Roeland de Baenst, ruddere.	Meester Geerolf van der Haghe.
	Geerolf Goetghebuer.
Oste Pappal.	Jan Heyman.
Joos van Wijchuus.	Jooris van Caudenberghe.^1
Jooris de Wale.	Lambrecht Beyaert.
Jan van den Bundere.	Zegher Bolloc.
Arend de Clerc.	Willem de Vos.
Daneel Onredene.	Joos de Bake.
Boudijn de Smet.	Jan van den Moure, in den Cop.
Christiaen de Hamere.	Mathijs Reyns.
Pieter van Boxelaer.	Anthonis van Loo.
Jan van den Denne.	Joos van den Haute.
Joos Polleyt.	Vincent van den Wijngaerde.
Jan de Brauwere.
Heuverdeken.	Deken van de Weverie.
Jacob van Wymeersch.	Jan de Vechtere.

[Scepenen van der Kuere ghemaect by kiesers die laghen

1 Jan van Caudenberghe. S.B.

[p. 308]

up de Collatiesoldere van up Onser Vrauwenavond Halfougst tot tsanderdachs up Onser Vrouwendach ten vij uren, ende waren uutgheroupen voor den noene a^o lxxviij. (S.G.)]

Item, in dit jaer (den xxvj in Sporcle, Pr. Ar.^B.) was te Ghent eene wapeninghe beghonnen van mueleners ende tijcwevers, die wederstaen waren van heere ende wet ter Veebrugghe, ende daer en bleef maer een doot, ende dat was een muelenere ghenaempt Pieter Goethals, buuten de Waelpoorte.

Item, in dit jaer begheerde Macximilian te Ghent eene ghemeene uutreyse die hem gheconsenteert was, ende trocken ute den xx^en in Wedemaent jeghens den coninc Lodewijc van Vranckerijcke te Blangijs voor Terwaenen, ende den slach ghebuerde den xij^en in Ougste daer de hertoghe Macximiliaen 't velt behilt ende den slach wan jeghens de Franchoeysen die daer alle bleven.

Item, in dit jaer was gheboren hertoghe Philips te Brugghe, binnen dat de hertoghe Macximiliaen te velde lach, up den xxii^en dach van Wedemaent, ende waren de peteren Adolf van Cleve, heere van Ravestein, minheere van Brean ende vrauwe Magriete van Jorc, weduwe van hertoghe Kaerle van Borgondien.

[Den xxii Wedemaent was te Brugghe gheboren hertoghe Philips, Maximilianus zone, die hy hadde by vrau Marie, hertoghe Carels dochter. - Up Sente Andriesavont in dit jaer quamen de canonicken van Haerlebeke binnen Ghendt, want de Franchoysen hadden Haerlebeke verbrant, ende deze heeren hielden huerlieder ghetyden in de Weverscappelle ter Vierwescheede. (Pr. Ar.^B.)

- Item, in dit jaer den xxii Wedemaent was te Brugghe

[p. 309]

gheboren hertoch Philips, Maximiliaens sone, die hy hadde by vrouwe Marie, hertoghe Carels dochter, ende Mer Adolf van Cleven, heere van Ravesteyn, die heffene uyt den name van keyser Frederick, ende hy dede den jonghen prince gheven een gulden sweert, ende de heer van Bryannen, heere van Simpol was de tweede peter in den naem van den coninck van Enghelant, ende gaf hem eenen gulden helme, ende de douagiere van den hertoghe Carle, was sijn metere, ende gaf een costelijck exsel, ende de lieden van Brugghe gaven vier vergulden kannen ende vier vergulde flasschen, elck houdende twee stoopen. (K.M.)]

Item, in dit zelve jaer was ghemaect een bestant, den xv^en in Hoeymaent, van een jaer by tusschensprekene van goeden heeren, tusschen den coninc van Vranckerijcke ende hertoghe Macximilianus.

Item, up den xxx in Ougste quam de hertoghe Macximiliaen ende vrauwe Marye binnen Ghent met haerlieder jonghen prinche Philips, daer groote blyscip ghedaen was van vierne ende figueren te tooghene.

[Den iii Meye quam de prinche te Ghendt in den Wal, maer eer hy er binnen was quam eenen messagier van Douway met eenen briefve die gaf eenighe van zyne heeren, ende men zeyde dat Condeyt verberrent was ende 't volck binnen al doot ghesmeten, dwelcke de contrarie bevonden was. - Tsanderdachs daer naer quam de prinche up 't Scepenhuus oorlof nemen, ende track naer Audenaerde ende alzo naer Henegauwe. (Pr. Ar.^B.)

- Item, den xxix Ougste quam uyt Brugghe de grave Philips, f^s Maximiliaen binnen der stede van Ghendt, ende was gheconvoyeert metter schutters van Brugghe ende

[p. 310]

penen van Ghendt; ende alle de duytschen reeden jeghens hem, ende daer waren wel ij^c en xxx kinderen knechtjens van xij jaren, ende daer ondere met witte schroede gegurt onder haerlieder schauderen, ende saten te peerde, ende hem was gheschoncken eenen gulden cop alvul goude ridders van die van Ghendt. (K.M.)]

Item, die van Doornijcke hadden paeys jeghens den hertoghe Macximilian omme eene groote somme van penninghen die zy den prinche gaven, ende beloofden nemmermeer gaernisoen uut Vranckerijcke in te nemene dat contrarie ware den lande van Vlaenderen, up de verbuerte van huerlieder goedinghen ende renten, die zy hebben binnen den lande van Vlaenderen, ende oock alle huerlieder lijfrenten te verliesene, indien zy iemand inne namen van 's conincks weghe; dit was uutghelesen te Ghent uuten Scepenhuse den xvij^en van Novembre lxxviij.

Item, in dit zelve jaer waren te Ghent vergadert de drie leden van der stede omme raet ende advijs te nemene hoe dat men de stede helpen zaude uut hare lasten daer zy inne was; want up dien tijt en dorstte niemant ter stede waert uutghaen hy en waert ghevanghen voor de stede rente, ende de drye leden sloten ghemeenlic dat de brauwers gheven zauden van elcke brauwte biers zes scellinghen grooten, van in Maerte lxxviij tot half Ougste gheduerende lxxxij.

[Item, in dit jaer, den xx Sporckele, was wederstaen de wapeninghe, die eenighe geeren volbracht hadden; daer waren eenighe ghevangen, ende hadden sy connen volcomen dat sy heer ende weth doodt ghesmeten souden hebben, ende waren onthooft tusschen bailgie; daer wasser ghebannen xxxvij ofte meer die meê gheweest hadden, ende laghen op

[p. 311]

de Veerleplaetse vij oft viij daghen, ende doen scheeden sy, ende binnen twee daghen daer naer soo was't collatie, te weten: waer men de last vinden soude daer inne dat de stede belast stont, soo was gheseyt dat men gheven soude van den pont groote acht groote van den pontghelde, ende het bier xiiij myten van half Ougste voor dry jaer ende niet langher. (K.M.)]

Item, in dit jaer waren uut Ghent ghebannen lxxxiiij personen uut der casselrye van Ghent, ende met den ghelde dat daer af quam van den lande ende poorte loste men renten van der stede die men sculdich was.

[Den xviij Meye dede de abt Raphael van Sente Baefs zyne intreye binnen Ghendt, dat de abt Jan van Sycleers van S^te Baefs up den zelven dach overleden was. (Pr. Ar.^B.)]