Memorieboek der stad Ghent van 't jaar 1301 tot 1793. Deel 1

1477.

Commissarissen.

Mijnheere van Ste. Baefs.

Mer Joos de Lalain.

Meester Andries Colins, president.

Mijnheere van der Gracht.

Jan van Dadyselle, hoochbailliu van Ghend.

's Heeren kiesers.	Der stede kiesers.
Jacob van Wymeersch, overdeken.	Jan de Vechtere.
	Zegher de Mey.

[p. 304]

Meester Bertelmeeus van Massemen.	Arend de Cleerc.
	Christiaen Dhamere.
Jan Rufelaert.
Jan de Poortere.
Schepenen van der Kuere.	Schepenen van Ghedeele.
Mer Joos van Ghistele, ruddere.	Ogier van Massemen.
	Gillis de Groote.
Geeraerd Goetghebuer.	Meester Christoffels de Grave.
Thomaes van der Stichelen.^1	Jooris van den Moere.
Symoen Damman.	Jan van den Abeele.
Jacob de Steenwerpere.	Jan van den Heede, f^s Michiels.
Lievin d'Hooghe, f^s Jans.	Willem Sloeve.
Jan van der Galleyen.	Jan Dullaert, mercenier.
Jan de Coninc.	Jan van den Heede, t' Sente Baefs.
Victor Deynoot.
Inghelram Steel.	Jan Vlamync.
Arend Mast.	Pieter van Hauwaert.
Lievin de Vechtere.	Jacob de Cleerc.
Lievin van Waes.	Jan de Cupere.^2
Heuverdeken.	Deken van de Weverie.
Jacob van Wymeersch.	Jan de Vechtere.

Item, den xxvij in Ougste dede hertoghe Macximiliaen van Oostenrijcke, keyser Fredericx zoone, zyne intreye binnen der stede van Ghent, die zeer blydelic ontfanghen waert.

Item, tsanderdachs traude hy vrauwe Marye, hertoghinne van Borgondien, binnen der stede van Ghent, ende was de edelste ende rijcste dochter van al Kerstenhede.

Item, den xxiiij van Ougste, beswoer de hertoghe Macximiliaen dlant van Vlaenderen.

1 Over hem Jacob Bolloc. S.B.

2 F^s Jans. S.B.

[p. 305]

[Op den xxv^en Juny quamen beede de voorscepenen die gheweest hadden by 's keysers zone te Ghendt; up den zelven dach so quamen de Ambassaten van 's keysers zone wel met ij^c peerden of meer.

Saterdach. Op Onzer Vrauwendach Half Ougste gheboot men so wie 's keysers zone den bruudegom eere doen wilde, dat zy hemlieden voorsien sauden van eenen witten kerle ende swarten hoet, met een roode cappe.

Sondach. Op den xij^en Augusti was gheboden dat niemant vechten en saude, noch beroerte maken, op den ban van x jaren ende partie ghenouch doen.

Maendach. Op den xviij^en Augusti dede Maximiliaen zijn intreye, daer jeghen dat reden de heeren van der wet, de heeren van den rade ende de heeren van den hove.

Dijssendach. Den xix Augusti, 's morgens ontrent den v^e, zo worden zy ghetraut met eender messe; daer naer zo vonden zy een imbijt, 't welke ghedaen zijnde ghynghen te ruste tot 's achternoens te vieren, ende s'avonds gaf de stede den bruudegom ende vrau bruut een bancquet.

Den xxj^en Ougste reysden zy t' samen messe hooren t' Sente Jans, ende 's achternoens waert ghesteken in den Wal ende zyne officiers vermaect.

Tsondaechs daer naer vergaderden alle de processien van Ghendt in den Wal tsmorghens ten vj^en ende ghynghen t' samen t' Ste. Pieters voor de poorte, aldaer zy vonden den heere van Ste. Pieters staende in de costelixste cappe met eender relique in de handt zonder den evangeliebouck, wywatervat, wieroocvat: hy verbeyde de compste van Maximiliaen; curts daer naer quam Maximiliaen met schoonen state ter plaetste voornoemt ende beette van zynen peerde.

[p. 306]

Tusschen de poorte ende de pelloryne daer hy vant twee cussenen daer up dat hy knielde, ende de proost, M^r Jacob Bertaldy, dede daer een oratie; de oratie ghedaen zijnde, men gaf Maximiliaen te cussene de evangelie van den daghe, daer naer het cruuce, ende men gaf hem wywatere ende wieroock, ende stont also uppe. (Pr. Ar.^B.)

- Item, in 't selve jaer soo keerden af die van Nimweghen ende meest Ghelderlant van den huyse van Bourgoigne. (K.M.)

- Item, in 't selve jaer track Maximiliaen van Ghent te Brugghe, t' Ypere, te Rijssel ende in andere steden, daer hy eerlijck ontfanghen ende ghehult was, ende oock in Brabant ghehult als man ende monboir van synen wyve. (K.M.)]

Item, in dit jaer stondt de papegaey van den auden gulde van Sente Bastiaen eer men afgeschieten conste, van sondach 's morghens tot den maendaech ten ix ueren voor de noene.

Item, in dit jaer en hadden de papen gheen nieu macne ende was Cleen Vastenavont daechs naer Onse Vrauwendach lichtmesse.

Item, in dit jaer resen hemlieden de Gheldersche jeghens die van Sertoghen Bossche met huerlieder quartiere, ende waren wederstaen van den Bossche, ende die trocken over met grooter macht in 't landt van Gheldere ende deden daer vele schaden; boven dien beleyden zy de stadt van Grave, ende stelden daer vooren blochuusen dat zy daer mede benamen huerlieder victuaelge, die hemlieden daer mede ghewert was, zoo dat haer de stede moeste upgheven metten sloote in den handen van Macximiliaen.