Memorieboek der stad Ghent van 't jaar 1301 tot 1793. Deel 1

1475.

Commissarissen.

Mijnheer van Ste. Pieters.

Mer Jan de Baenst, over minen heere van Ste. Baefs.

Mijnheere de protonotarius.

M^e Thomaes de Plaine, president van Vlaenderen.

M^e Jan van den Broucke.

M^er Lodewijck van Scorisse, ruddere.

Schepenen van der Kuere.	Schepenen van Ghedeele.
Jan Utenhove, f^s Jacobs.	Jan van Vaernewijc, heere van Bost.
Jan van den Poucke.
Symoen Borluut, op 't Sant.	Pieter de Rijcke.
Vincent Meyeraert, f^s Jacobs.	Gautier van der Zypen.
Jacob Mannins.	Symoen Borluut, in de Veltstrate.
Lievin Sersymoens.
Laureyns de Loose.	Cornelis de Bloc.
Jan Obrecht.	Jan van Pollaer.
Christoffels van West.	Pieter de Backere.
Gyselbrecht van Peteghem.	Jan van der Muelne.
Jan Everaert.	Jan Alaert, caescoopere, over hem Martin Baert.
Gillis van der Beke.
Willem van Wanzele.	Jacob Utendale.
	Pieter Rosseel.^1
	Martin Zoetaert.
	Jan Clyncke.
Heuverdeken.	Deken van de Weverie.
Joos van Melle.	Michiel van Overloop.

1 Pieter Rousseel. S.B.

[p. 292]

Item, in dit jaer was de grave van Simpole verwijst te Parijs by de heeren van den Paerlemente onthooft te werdene.

[Den xix^en Decembris was by de heeren van den parlemente van Parijs verwijst ter doot de grave van Sainct Pol, ende wart binnen Parijs up een schavaut onthooft up den Dertienavont. (Pr. Ar.^B.)]

Item, in dit jaer wan hertoghe Kaerle 't hertochdom van Loreynen ende van Baren ende 't graefscip van Vendemont, ontrent Sente Martinsmesse, vechtenderhant.

Item, in dit jaer, naer Sente Michielsdach, reysde naer 't lant van Baren de hertoghe Kaerle; want de grave van Vendemont, die corts worden was hertoghe van Loreynen by de doot van hertoghe Nychaeys van Calabren, die den hertoghe Kaerle ontseyt hadde terwyle dat hy voor Nusen lach, nemende den coninc van Vranckrijcke daer mede om hem vrienscepe te doene, ghelijc hy ooc dede, maer de coninc veinsde hem dus ende en track hem niet anne, ende also es de hertoghe Kaerle ghetrocken voor de stad van Nanchy, die hy corts wan ende noch ander steden ende sloten van den lande van Loreynen, ende de hertoghe vloot in Vranckrijcke ende was up dien tijt xx jaer aut.

Item, d'hertoghe Kaerle hadde cause ende acxie up de Switsen; want zy zijn lant van Floretten jeghens hem bescudden wilden.

Item, up den xxviij van April was te Ghent eene dachvaert van allen den landen, ende daer was by den canselier van Borghondien begheert t' hebbene den zesten penninc van den lieden goede alle de landen duere, ende voorts begheerde hy t' hebbene met hem vrauwe Marye, omme met hem te

[p. 293]

voerne in Borgondien; ende up den xxvj^en in Meye was de begeerte ontseyt by den ghemeenen landen.

[In dit scependom saten zes ghezellen en droncken, van de welcken de eene slouch den anderen van de banck, ende dier ghesleghen was pijnde hem wech te loopene; maer hy vant de duere ghesloten. Hy dat ziende keerde hem, ende stack er eenen doot. 't Faict ghedaen hebbende wart hy ghevanghen ende ghebrocht ter vierschare, omme verwyse; ende hy dede dynghen dat hy 't ghedaen hadde over nootweere, waer uppe dat scepenen te rade ghynghen, ende wijsden hem t' hulpen den anderen dach. De ooryde ende informatie ghehoort zijnde, zo wesen scepenen den misdadighen los ende ontsleghen. Actum den vi Novembris, in vierschare. (Pr. Ar.^B.)

- In dit scependom was brocht in ghebannen vierscaren Jan Pinsemailge, omme dat hi brocht hadde eenen man van live ter dood, ende was quyte ghewijst mids zijnder groot noodweere. (S.B.)

- Item, in dit jaer, als 't bestant uyt was tusschen hertogh Carle ende den coninck van Vranckerijck, soo hebben de Franchoysen in Artoys ende te water veel schaden gedaen, ende namen somighe cleene steden inne. (K.M.)

- Item, in den tijt dat de hertoch Carel voor Nuse lach, soo wasser een verbant ghemaect tusschen den coninck Eduwaert van Enghelant ende hertogh Carel, jeghens den coninck van Vranckrijcke; ende de coninck van Enghelant is overgecommen in Picardyen, omme 't lant van Normandien weder te winnen, ende de paeys was ghemaeckt tusschen den coninck van Vranckrijcke ende den coninck van Enghelant, als dat de jonghen sone van Vranckrijcke nae-

[p. 294]

maels trauwen soude de dochter van den coninck van Enghelant. (K.M.)

- Item, in 't selve jaer was een bestant ghemaeckt tusschen den hertogh Carel ende coninck Lodewijck van ix jaren lanck ghedurende den coopman van varende ende keerende, omme te trecken oorloghen in Loreynen. (K.M.)

- In dit jaer liet hertoghe Kaerle achtere in de handen van zynen vianden de tresor van hertoghe Jan, zynen grootheere; een juweel gheheeten Ocketoy. In dit Ocketoy was een hoyxkin ghemaect van fyne gaude ghesteente ende peerlen, ende was gheextimeert meer weerdich zijnde dan 't landt van Brabant ende Vlaenderen. (Pr. Ar.^B.)

- Van Sente Pietersdach in Sporcle was 't zonder regenen totten iij Augusti, ende in 't jaer ontrent Martensmesse wan hertoghe Caerle het graefschap van Loreynen ende wan Vermandoys. (Pr. Ar.^B.)]