Memorieboek der stad Ghent van 't jaar 1301 tot 1793. Deel 1

1343.

Schepenen van der Kuere.	Schepenen van Ghedeele.
Simoen Parijs.	Pieter de Clerc.
Jan van Gheluwe.	Jurdaen ser Sanders.
Gillis van der Pale.	Willem van Coudenbrouc.
Geeraert van der Nieuwermolen.	Heynric van Vicht.^1
	Heynric van de Vierwechsteden.^2
Lievin Bevelant.

1 Van der Vicht. S.B.

2 Van de Vierweghesceeden. S.B.

[p. 54]

Jan van Vinet.	Jan Bette, de vleeschouwere.
Jan Huugs sone.	Jan de Hase.
Pieter van Bassevelde.	Gillis de Keysere.
Jan Ondermaerct.	Jan Willaus.
Pieter Mabensone.	Lievin de Visschere.
Lievin van Cleenpitte.^1	Jan van der Hoyen f^s Jacobs.
Lievin Bruunpeere.	Jan van der Hoyen f^s Clays.
Jan Louf.	Jan Soetaert, over hem Mattheus van Ghentbrugghe.

Item, in dit scependom was te Ghent up de Vrydachmaert den ij^en Meije den Quaeden Maendach, doen de volders t'onderghynghen, daer veel volcx doot bleef, daer som spronghen in de Leye ende vele verdroncken, emmers de wevers quamen te boven ende hielden d'overhant.

[Anno xliij (in Wedemaent K.M.) ordoneerde Jacob van Artevelde binnen Ghent liij dekenen, eenen van elcke neerynghe ende van al eenen euverdeken ende eenen van de weverie om dat 't volck van der stede an dese twee dekene zouden moghen hoofden. (S.G.)

- Item, in dit jaer den ij Meye was te Ghendt op de Vrindachmaert den Quaden Maendach, ende dit quam toe omdat de volders hebben wilden van de Wevers iiij grooten meer dan de Wevers gheven wilden, ende Geeraert Denijs, deken van de weveryen, track met die van den ambacht ter maert met Jacob van Aertvelde, ende daert wert doodtgheslaghen Jan de Backere, overdeken van de neeringhen, daer groote disertie omme quam, ende de weverye behielt d'overhandt. (K.M.)]

1 Lievin van den Cleemputte. S.B.

[p. 55]

Item, in 't voornoemde jaer bleef doot grave van Henegauwe in Vrieslant met vele volcx.

Item, Jacop van Ertvelde trac metten Vlaminghen uute ende beleyde Dornyke. Dit verhorende de coninc van Vranckeryke hy dede paeys maeken met Jacob van Ertvelde ende met de drye steden van Vlaenderen, ende daer waren weder van nieus gherelaxeret de sententie van verwatenesse, die de coninc Philips de Langhe hadde vercreghen an den paus jeghens dlant van Vlaenderen omme dat zy den grave Lodewijc rebel waren. Dese voornoemde letteren waren voor Dornyke ghescuert ende te nieuten ghedaen by consente van den tween cardinalen ende den coninc van Vranckerijc, ende corts daer naer quam de grave Lodewijc in Vlaenderen, maer de drye steden hadden al 't regement van den lande, ende zy hielden de ballinghen binnen 's lans.

Den voorseyden Jacobus d'Aertevelde alhoewel hy edelman was ende syne familie, omme beter gheacht te syn van het ghemeynte, die hem vergeten hadden, maeckte ende verkoos een ambacht van de Brauwers, niet dat hy 't selve ambacht dede, maer om de privilegie te genieten ende de vryhede van 't selve, ende wiert vercosen den eersten souverainen deken van de stadt, alwaer hy seer bemindt ende geacht wiert, in het welck hem naervolgden veele andere edellieden vander stadt om gheacht te syn van 't ghemeynte ende om tot die weerdigheyt te commen tot het officie van souverainen deken. (K.M.)