Eerste bouck van beschryfvinghe van alle gheschiedenesse (1562-1572)

XXIII a
Schepen F. de Rouck vraagt bedenktijd voor het opstel van zijn verweerschrift inzake het verblijf van predikanten op het kasselrijhuis (bewijsstuk bij dokument nr. XXIII)⁽²⁵⁾.
8 november 1566

Alzoo, up den VIIIen Novembris XV^c LXVI, vertooch ghedaen was by den college van den zaele ende casselrie van Ypre, vergaedert weezende in huerlieder camere van secrete, jeghens ende ten laste van Franchois Rouck, schepen der vorscreefven casselrie, ghemerct ter kennesse van dezelve vorscreefven college ghecommen was, dat hy op zekeren. Zondach, weezende den XXVIIen van October laestleeden hem vervordert hadde up 't huus deser casselrie, allenelic ten dienste van de vorscreefven college dienende ende alwaer zy ghewoone zyn dagelicx recht ende justicie van 's coonyncx weeghe ende te administrerene te bringhen, 's noens, ter maeltydt zeeker ministers ofte predicanten van de nieuwer relligie met hemlieden eetende ende drynckende, contrarie d'oude observatie ende als noyt meer ghebuert zynde; ende overzulcx hem tzelve 't voorscreven college grotelicx vyndende gheschandaliseert, gheoffenseert ende gheïnteresseert van huerlieder goede oude reputatie, naeme ende fame, als weezende ghehouden voor 't notabelste van den casselrie van West-Vlaendren ende by dien gheensins gheadviseert weezende tzelve te lyden, noch in zekere vormen ende manieren te ghedooghen in dese casselrie, hem overzulcx by dien ghevrach doende of hy hem noopende tgoone daerinne ghemesuseert was wilde ghedraeghen, zoo van ouden

(25) RIJKSARCHIEF BRUGGE, zefde fonds, nr. 30.

[p. 123]

tyden gheuseert was, in zulcx als by de voorscreven college gheordoneert zoude weezen.

Ende overmidts den voorscreeven Rouck, ghehoort hebbende 't voorgaende vertooch omme up tzelve submissie hem te beraeden ende delibeereerene binnen achte daeghen, zoo was den vorscreeven dach van deliberatie hem by der vorscreeven college gheconsenteert tzynen verzoucke, midts nochtans hanghende den vorscreeven tydt hem te absenteeren van de college collegialiter in huerlieder vierschaere ofte camer van berechte vergaedert weezende, waeraf jeeghens ende van welcken verclaerse den vorscreeven Rouck verzochte hem acte ghegheven ende verleent te zyne, protesteerende van in gheen boete te commen ter cause van de vorscreefven absentie.

Verclaersde by 't bringhen van de vorscreefven persoonen up 't vorscreefven huus ende met hemlieden gheëten ende ghedroncken hebben, aldaer niet meende eenichssins ghemesuseert t' hebbene, zonderlynghe dat ten zelve daghe gheen vergaederynghe was van schepenen, nemaer particulieric quam eeten, ghenoot weezende van den ontfanghere op 't vorscreefven huus woonende, hoewel de vorscreefven persoonen buuten weeten van dezelve ontfanghere by hem ghebrocht waeren uut familieriteit die sy met elcanderen hebben, verzouckende by dien nietmin hem dach gheconsenteert te zyne.

Actum, ten daeghe ende jaere als booven, present den bailliu ende schepenen.