Eerste bouck van beschryfvinghe van alle gheschiedenesse (1562-1572)

XX
De Ieperse kasselrijoverheid deelt de bevolking mede dat volgens een schrijven van Margareta van Parma de koning zijn komst in de Nederlanden aankondigde⁽²¹⁾.
4 juli 1567

Men laet weeten, dat mynne heere den hoochbaillu, voocht ende schepenen deser stede hedent ontfaen hebben beslooten brieven van

(21) RIJKSARCHIEF BRUGGE, zelfde, fonds, nr. 25; de brief van Margareta van Parma werd gepubliceerd door DIEGERICK in Documents du XVI^e siècle, dl. IV, blz. 46.

[p. 115]

Mevrauwe de hertoghinne van Parme ende Plaisance, etc., regente, gouvernante van den Landen van herrewaerts overe, uuter naeme van den coonynck onsen gheduchteghen heere in daetem van den derden deser maendt by der welcken hueren hoocheyt verclaert onlancx ontfanghen t' hebben brieven van de Coninclycke Majesteyt, daerby dezelve metter hulpe Gods verzeeckert zyn compste binnen den Lande van herrewaertsovere vóór het eynde van desen Zomere, met expressen verclaerse dat Zynne Majesteits meeninghe ende wille niet en es te commen omme de Landen van zynne onderzaeten inwoonende van dien te verdrucken ende verderven, nemaer omme dezelve met alle goetheyt ende ghenade te handelen.

Bevelende tzelve eenyeghelyck te kennen ghegheven te zyne ten eynde dat elck hem wederomme stelle ende continuere in zyn handwerek, neeringhe, coopmanschepe, styl ende ghecostumeerde trafyeque, betrauwende up de naturelle goetheyt ende ghenade van Zynne Majesteyt, zonder voorts meer uuten lande te vluchten, up peyne van daerof ghenoteert ende naermaels voor ontwerden gheacht te zyne van Zyne Majesteits gratie ende pardoen; ende want omme dezelve gratie ende pardoen te ghenieten ende gheen bequamere noch apparenter middelen es, dan de ghoone die binnen een jaer harewaerts duer diversche onverhooricheyt, rebellen ende schandalen, God almachtich ende Zyne Majesteyts tot gramschepe verweet hebben, wederomme zullen keeren tot eendrachticheyt van der catholycque kereke, biddende God verghevenesse van huerlieder misdaet ende hemlieden wederomme stellende ter onderdanicheyt van Zyne Majesteyts, mitghaders van zyne officiers ende wethouders, in zulcker wys dat de ghemoleerde kereken, oultaeren, beelden ende andere zaecken ten dienste Gods beschiet, moghen wederomme met alder neersticheyt ende haeste ghepareert zynde ende in huerlieder eersten staet ghestelt.

Zoe heeft haere Alteze daertoe een yeghelyck ende zonderlynghe de mesweechde wel willen vermanen, lastende voorts een yeghelyck te doen, zoveel particuliere als publicque bedinghen voor een goet gheluckich voyaige van Zynne Majesteyt, ten eynde dat deur zynne middeie desen landen in ruste ghestelt moghen wesen, alzoo 't dient ter eeren Gods ende tot onderhouden van onsen ouden catholicquen cristelycken gheloove, daertoe processie-generaele binnen deser stede ghedreghen weerdt metten Helighen Sacrament ten zulcken daeghe als naemaels ten publicatie van weghen mynne heeren van der wet te kennen ghegheven werdt.

Ende, ten fynne een yeghelyck te bet gheïnformeert mach wesen van den inhouden van de voorscreven brieve van Haere Alteze, zo werdt daeroff lecture ghedaen, zo hiernaer volcht van woorde te woorde.