Eerste bouck van beschryfvinghe van alle gheschiedenesse (1562-1572)

XI
De Ieperse kasselrijoverheid deelt Margareta van Parma mede, dat haar nieuwe voorschriften moeilijk vatbaar zijn voor toepassing, gezien het hoge aantal hervormden⁽¹²⁾.
9 december 1566

Madame, ayantz avant-hier eu communication de certaines lettres émanantes de Vostre Alteze s'adresschantes conjoinctement à nous et à ceulx de la ville d'Ypre, par lesquelles nous est enjoinct et commandé de par tous moiens, à nous possibles, obvier et pourveoir que les ministres de la nouvelle relligion doresenavant ne se advanchent soulz umbre des simples presches et déclaration de la parolle de faire aultre exercice de leur relligion comme jusques ores ilz se sont ingéré, si comme d'administrer le sacrement de baptesme, solemniser mariaiges, cènes, consistoires, sinodes, escoles, collectation des deniers et aultres plusieurs abuus et schandales, avons incontinent député le bally de ceste Chastelenie vers la ville de Messines laquelle suelement (et non en aultre lieu en ceste Chastelenie) leur est accordé place par Monseigneur le gouverneur povoir faire exercice de leur pressches pour illecq leur donner à cognoistre l'intention de Vostre Alteze, suivant la charge par lesdictes lettres à nous données, lequel s'y trouvant le jour d'hier audict lieu et ayant faict avecq l'assistence... de Danfrapez grand-bally de la susdicte ville de Messines, ensemble ceulx de la loy, assembler certain nombre des plus notables de ladicte relligion nouvelle, leur ayt en vostres dessusdictes lettres et de la part du roy, nostre sire, faict deffense et inhibition bien expresse et sur peine d'estre rigoreusement pugnis en corps et en bien de ne s'ingérer aulcunement doresenavant de faire aulcun exercice de leur relligion aultre que la simple pressche, s'abstenantz de toutz aultres administrations et solemnisation par avant par leur ministres induement et contre l'intention de Vostre Alteze usurpées, à laquelle remonstrance combien que lesdicts de la susdicte relligion après avoir eu refus de la copie des lettres par eulx demandée, ont déclaré n'avoir auleune intention de contravenir ou infraindre les commandementz de Vostre Alteze, ains qu'il estoient prestz à se conformer et rigler selon yceulx, si avant que les aultres de leur secte ès places circonvoisines se accommodissent pareillement audictes def-

(12) RIJKSARCHIEF BRUGGE, zelfde fonds, nr. 13. De tittels duiden de leemten (ingevolge beschadiging) aan.

[p. 108]

fences; néanmoins, aiants entendu la rébellion et l'obstinate responce de ceulx de la ville d'Ypre de ne vouloir obtempérer aulx décrets, commandements, de faict journellement ont monstré par deffault.

Et partant, craindant, veu la conditionale responce desdictz de Messines, qu'ils se pouldroient joindre avecque lesdicts d'Ypre et aultres places circonjacentes et ainsy faillir à leur promesse, n'avons voulu failler d'en advertir Vostre Alteze, supplians bien humblement d'estre advertys d'ycelle comme advenant l'infraction des choses susdictes nous nous aurons à conduire à l'exécution d'ycelles, priant d'avoir regardt et considération que l'apprehention la personne de leur ministre, lequel est passé longtamps banny et mis a pris, est assez difficile, veu le grand nombre du peuple qui l'accompaignent et le dangier qu'il en dépendit, advenant sa prinse, qu'il ne fust ravy des mains de la justice, dont grand désordre en pouldroit advenir.

Offrantz, néantmoings, de nous emploier de tout notre povoir et forces à la sustentation de nostre saincte foy catholycque et entertènement de bon vouloir et plaisir de Sa Majesté et de Vostre Alteze, priantz le bon Dieu à ycelles vouloir octroier sa saincte grâce.

D'Ypre, ce IX^e du mois de décembre LXVI.

Les entièrement prestz au service de Vostre Alteze, bailly et esschevins de la Salle et de la Chastelenie d'Ypre.