[1564]
Op den VII dach van Sporkel, zoo heeft den bisschop zyn voyage gheënt, hetwelck hy ghedaen heeft in conciliën te Trente, ende was in ghehaelt van myn heeren van der wet, ontrent den drien uren naer noenen.
[3] In 't jaer 1564, zoo was 't alzoo stercke een winter van voorst, als dat by 50 jaer noyt derghelyck ghezien en was, want het beghonste ontrent de weke vóór Kerstdach, want in de Kerstdach mesdaghen zoo vroost wel zoo zeere datter gheen kelders en waren, het vervroos alle datter in was, want men hadde wel op het ys van eender nacht met een pert daerover ghereeden zonder dangier, want het vervroos alzoo sterck toe, dat men daerover ghinck alzo men wilde, ja om dieswille dat zoo sterck toe was, men hielter maert op ende grooten vergaderinghen van volcken, men stelder cramen ende men cockter een schap ende briet dat daer op ys om dieswillen datter gheseit zouden wesen dat het alzoo eens ghebuert hadden met waerheyt ende het volck was zeer langhe t' Yper ende alomme zonder werck, maer die lieden ghedoochten 't te bet, want het cooren was goeden coop. Ende den voorst gheduerden tot by Vasten avent.
In 't jaer 1565, zoo was 't t' Yper eenen Hans Roothaer met noch twee van zyn compliten als laper ende noch een jonck gheselle van 20 jaer ghebrant metten vieren, op den 25 dach van Oust, op 's dachts naer sente Bertholomeusdach.
Ende ontrent desen tyt, zoo beghonst het cooren te diersen, zoo dat men 't in Septembre beghinsel van der maent cochte 14 pontgrooten de razieren.
Auteursrechtelijk beschermd