Den tydt die lydt par Hernighem
1562
[1] In 't jaer ons Heeren, duust hondert ende twee en tsesstich, ontrent Bamesse, zoo quam te Bouschepe op het kerckhof, een valsch predicant by name Gheleyn Damman ende dede een sermoen op den zelven tydt ende prochipape hadde dat gherne belet, maer hy en conste ende dat om de menichte van den volcke dat daer ontrent stont met gheweren wel voorzien tot defentien van den predicant.
Dien dach passerde. Ende coors nadat dit ghebuert was, zoo quam den procureur-generael, by laste van den Hove, tot Yper, dachter veele in van den gonnen die daer present waren, als het sermoen was ende, ghecommen zynde, was henlieder verbooden uuter stede niet te gaene op groote verbuerden, ende bin vyf ofte zes daghen waren der veele in de vanghenesse gheleeit, als daer informatien op ghehouden was, hetwelck ghebuerde ontrent uutganck van Novembre.
Ende corts daer naer, zoo was onthalst den weert ‘In de Croone’ by den Scherpenberch ende den ander was een rycke bachter by toenamen van die bosseraens. Ende daer lachter noch veelen ghevanghen.
Ende op sinten Vincentsdach, zoo was in 't woort datter drie den hals af ghesleghen zouden wesen, hetwelcke 't sanderdachs ghescheide, want de procureur-generael met twee raetsheeren deden die excecusiën doen; ende den procuruer-generael ghynck zelve ter sale aldaer zy ghevanghen laghen; ende men leede se naer die hallen, aldaer zy verwesen waren: den eenen Kesstiaen Schapshooft, Mahieu van Peperstraten, Pieter Polet, smet van Renighelts.
[2] Ende daer te voren wasser veele ghegheselt, geschavoteert ende op de gayleyen ghewesen ten ewighen daghen, ende ander met toorsen verghevenessen, ghebeeden voor het sacrament. Ende meest alle die justiciën was ghedaen by den procureur-generael ende twee raetsheeren van den Hove daertoe ghecommen.
Auteursrechtelijk beschermd