Auriacus, sive libertas saucia

[p. 131]

Scriverio meo de filiolo nuper nato.

Tui lepores Scriveri, paruus tuus,
In ore cuius, cuius in blandis genis
Pudica mater viuit, & dulcis pater
Mox insolenti leniter serpet gradu,
Mox & süavi blaesus alludet sono,
Foenoque paruum condet & plumâ larem:
Ridere noli: totius praeludium
Instantis aeui primus est vitae lepor.
‘Viris quoque ipsis grata sunt crepundia
Opum cupido mollis, aut honor levis.
Ridere noli: ludibunda res homo est.
Semelque pueri nascimur, semper sumus.’