Rymkronyk van Jan van Heelu betreffende den slag van Woeringen van het jaer 1288

[p. 571]

CCXII. 25 juillet 1275¹.

Ane alle deghene die dese lettren selen zien ende hoeren Godevaert vanden Panhuse, wilen amman van Brusele, saluut ende warheide te wetene van dien dat hier in bescreven es. Ic dowe² u dat cont, dat et geviel, bi den tide dat ic amman was, dat een twist was tushen die van Hockensele, ende die van Erpse, omme een brouc, dat te Hockensele gheleghen es, dar hem die van Erpse rechts toe vermaten, in soe verre dat ic al dar quam, bi des hertoghen hietene, ende nam met mi heren Heinrike Berewoude, die van shertoghen halven al daer comen was, mijn heren Heinrike van Lelle, heren Arnoude van Winenghem, ende Woutren den Sas, ende dede aldaer eene warheide, al vore hen, van dien brouke, howe et dar mede staen soude, ende wies et wesen soude, ende nammere towe doude ende domsaten, die dar af weten souden. Ende quam ter waerheiden her Sandrijn, die pape van Nederhockensele, Willem vanden Driesche, Reniere van Velthem, doude her Daniel van Lare, Jacob van Lare, Gorys van Lare; ende bevinc de pape, die voreghenoemt es, bi sire priesterscape, dandre suorent ten heileghen, bi ghestaveden eede, dat si al dar waren, ende hoerden ende saghen daer die hertoghe Heinrijc, die te Kuelne starf, sat al tote Hockensele, in eene scure, ende quam al vore heme her Vranke van Lies, die men hiet den ouden heren Vranken, dies dat brouc was, ende drouch op, bi sins selves wille, den hertoghe dat brouc, in sine hant³, den lieden van Hockensele tgars, ende den gherven de risere⁴, ende alsoe ontfinct die hertoghe, ende alsoe soe gaf hijt voert. Voert tugheden wale si xv, op haren iet, dat si hebben hoeren segghen, dat dit waer was; oec tugheden si alle dat sijt die van Hockensele alsoe hebben sien houden, ende dat si die van Hockensele altoes hebben sien scutten dire verkene van Erpse, ende hare quic, alst daer op quam⁵. Ende omme dat dat de wareide aldus vore mi ludde, ende vore shertoghen man, die hier vore bescreven staen, soe hebbic minen zeghel ghehanghen ane dese lettren, met der man seghele, die dar over saten. Dese warheide was ghedaen in den iare ons heren MCCLXXV, in sente Jacobs daghe in den oegstmaende.

[Folio xlvij, verso.]

1 Ce rapport d'enquête, dite vérité, est probablement la plus ancienne pièce connue de ce genre, écrite en langue flamande. Quoique datée du règne de Jean, elle se rapporte à des contestations qui eurent lieu antérieurement.

2 Dowe, doe; comme plus bas howe, pour hoe, et towe pour toe.

3 Hant, pouvoir.

4 Den aengeërfden het ryshout.

5 C'est-à-dire: dat zy de invooners van Hockensele, telkens dat er verkens of kwikvee op gemeld broek kwamen weiden, dezelve beesten hebben zien aenslagen, krachtens schuttingsrecht.