Logo DBNL
Rymkronyk van Jan van Heelu betreffende den slag van Woeringen van het jaer 1288 (1836)

Rymkronyk van Jan van Heelu betreffende den slag van Woeringen van het jaer 1288

(1836)–Jan van Heelu–rechtenstatus Auteursrechtvrij

Vorige Volgende

CLXXXIV.

Texte français de la keure précédente, pour le pays de Nivelles.

The sont les loys don Romanch pays de Brabant.

Nous Jehans par le grace Dieu dus de Lothier, de Brabant et de Lymbourg, fasons savoir à tous chiaulx qui ces presentes lettres veront et oiront, que purement pour Dieu et pour nostre ame, et pour les ames de nos ancisseurs et de nos hoirs, et pour l'aligence de nos gens de nostre baillie de Nyvelle, et des appartenances, en la maniere comme nos baillus le tient, et pour l'amour que Nous avons viers eauls1, donnons et ottroyons à nous gens de la dite baillie tel droit, comme chi apres s'ensuit, que Nous avons fait par le conseil de nos hommes et de nos gens de nostre pays.

C'est assavoir, quiconque l'autre dément, ou dist: honnés soyes, ou malemeschance vous avingue, ou vous estes malvais, par félonie, il doit payer V s. de Lovignois, petite monnoie à Nos, et à nos successeurs, c'est assavoir le gros tournois vies2 du coing le roy Louwis pour XVI deniers, ou le value; et est assavoir, que se li dis gros alaist pour mains3 en borse communement que pour XVI deniers, nous averiens le gros turnois pour tant qu'il couroit, et s'il alaist pour pluyst, tons jour l'averiens Nous pour XVI deniers, et ottelle monoie4 doit-on payer toutes autres amandes.

Et se uns vilains le fait, ou dist à un chavalier, ils est à C s.; et se uns vilains le fait, ou dist à un varlet estrais5 de chevalier, il est à XX s.

Et s'il advenist que aucuns boms férist un autre, de main, ou boutast dou piet, ou desciraist ses draps, ou tiraist par che caveaulx6, sans sanc faire courir, il en seroit à Nous et nos hoirs à V s., et doit amendier le meiffait é sou aversaire, par le conseel des hommes, ou des eschevins; et sc chis varles keoit7 à terre du cop, ou de le bouture, dont seroit ses adversaires à XV s. à signeur, et se sanc avoit de ce fait, dont seroit ses adversaires à XX s.

Et se uns vilains de se main feroit un chevalier, il perderoit le main, à le volenté dou signeur, et se li boutast dou piet, il perderoit le piet, à le volenté dou signeur.

Et se uns villains ferist de main un varlet, estrais de chevaliers, ou boutaist dou piet, il en seroit à C s.; et se chis varles cheist à terre dou cop, ou de le bouture, li vilains en seroit à VII livres X s.; et se li dis varles savoit de celui fait le vilain en seroit à X livres.

Chius qui un baston trait ou lieve pour un autre blechier, sens férier, il est à X s.; qui un autre fiert du baston sens sanc faire, il est à XX s.; et si le fiert à terre sens sanc, il est à XXX s.; et si le fiert si qu'il saingne, sans afoler menbre, ou os oster du chief, il en est à XL s.; et si l'afolle d'aucun membre, ou il le convient os oster dou kief8, d'ou cop de celui baston, il est à C s.

Qui trait une espé pour aucun blechier, sans férier, il est à XX s.; et s'il en fiert aucun et sanc en yssist, sans afoller membre, il en seroit à C s.

Et s'il advenist que aucuns affollast l'autre aucun menbre, sans armures defendues, sens perdere

le membre, il en seroit à signeur à VII liv.; et se perdist le membre, membre contre membre, à la volenté don signeur; et s'il morist corps contre corps, et les biens que de luy vienent, de quoy il a court et signeur, le moitiet à le volenté don signeur.

Oui autre bleche d'armes défendues, saus faire sanc corrant, il est à XXX s.; et s'il saingnaist il seroit à LX s.; et qui autre affolle d'armures deffenduez il est à X livres.

Che sunt d'armes defendues, pikes, coutiaulx à pointe, misericordes....machues, bastons-à-bordon de fier, toutes manieres de sajettes, paffus, uisarmes, escus-à-pointe de fier, que on pourte suer le braech.

Qui pourte armes defendues il en seroit à X s., et qui trait ou lieve sour autre armes defendues, saus coutiaulx-à-pointe u espée de stoch, il en est à XX s.; et qui trait coutiel-à-pointe ou espée dou stoch pour autre blechier, sans férier, il en est à XL s. à signeur, et s'il n'at l'argent, on li féra le coutiaul-à-pointe u l'espée de stoch parmy le pame1; et qui autrui boutroit de coutiaul-à-pointe u d'espée de stoch, et fesist plaie overte, il en seroit à XX livres à signeur, et le main perdue de quoy il l'airoit boutet.

Qui autrui trait par avis2 il pert corps et avoir.

Et qui seroit en mortel wiere3 il poroit pourter toutes manieres d'armures hors triuwes.

Qui embleroit de souls V s.4 on le doit enseigneer5, et se on le trovaist ensigniet, et encoires emblaist, il devera perdre le vie et le moitiet de ses biens, à le volentet dou signeur.

Qui feu u roberie u tenserie6 feroit, il aroit perduit corps et avoir.

Qui dame u damiselle enforceroit, on li deveroit le col soyer7 d'une plancke.

Qui triuwes briese on le doit partier en quatre, et li sieres doit faire mettre à IV corons8 de se terre, et nul ne peut triuwes brisier à celuy avoic quy il menegue et boit cescun jour, ne à celi qui à lui les triuwes briese à celle oaude mellée9, et non pour quant10 les triuwes demoront estables à tos les autres, fors à celui qui les triuwes a brisiés.

Qui un homme suiroit u queroit en une maison, par caude melée, il seroit à XV s., et cescuns qui le sieroit11 en sen ayde à XX s.

Qui maysons assaudroit de jour par avis, si ne fuist pour ses enemis mortels principaels effait12, il en seroit à X livres, et cescuns qui le suroit en ayde à LX s.

Qui maisons assaudroit de nuit, par avis en conseil pris, se ce ne fuist pour ses enemis mortels principauls effais, il en seroit à XX livres, et cescuns qui le suiroit en s'ayde à C s.

Qui li varles le signeur demande triuwe, ou qui les demande de par lui, sy les escondist, et nient ne les donne il est à XX s. à signeur, et se les demande autre fois, et il les contredist, il est encore à XX s.; et se les demande le tierce fois, et adès par tesmoignage, il est le tierce fois à XX s.; et apres chou le puet tenier chis, qui les triuwes li demanda, pour le meffait et pour les triuwes; et se chius s'en vat par foree il en est à XX liv.; nient pourquant si sont il truiwes13; et se il le comandaist à tenier14 ou aucun malfaiteur, chius qui lui ne ayde nient il en seroit à XX s.

Qui bornes osteroit il en seroit à XX liv.; qui bornes mettroit sans les hommes, qui à mettre doient estre, ou sans droit, il en seroit à LX s. à signeur.

Qui le varlet à signeur ou à un autre son pan1 u son gage teroit, il en seroit à XV s., et se payeroit à l'omme son damage.

Qui biens arrestées, qui par droit sont arrestés, prent, ou ayert2, il est à LX s. à signeur, et li convient les biens rapporter à liu, u il furen, et en droit.

Qui enfans desagiés enmaine envoie, se ce n'est par le conseel dou pere, del mere, et des parens, il a fourfait côrps et avoir; et qui dame par force u damiselle prent, il ne puet jamais ravoir le terre s'on le trueve en veriteit, et en fourfait cors et avoir à signeur; et si fuist ensi que la dame ou damiselle avoec lui demorast, et desist: que ce fuist de sa volenté et de son greet, donc averoitelle perdu ses biens, jusques adonc qu'elle revenroit et diroit que ce fuis en contre sa volentet; adonc goiroit-elle3 de ses biens; mais se elle apres se retornast à cely qui par force l'airoit enmenée, doncques aroit-elle perdu ses biens, tant et si longement qu'elle viveroit, à oels4 le signeur de le terre, sauf le droit dou plus prochain signeur hiretable; et apres sa vie le retournent et revienent à ses plus plus prochain oirs, hoirsmis les enfans qu'elle airoit de celi homme, qui par force l'en airoit menet, car chil enfant ne puewent riens avoir; et s'il advenoit que femme u homme ad ce aydaist, ou consillaist que dame u damoiselle fuist par force prinse ou enmenet, et on le trovaist en veritet, chius ou celle averoit fourfait corps et avoir, sauf les droits dou plus prochain signeur hiretable.

Qui cope l'arbre d'autrui ou briese soels5, ou prent son bleit, erbe ou fruit, à la value desouls V s. sans congiet, et on le trueve à le veritet, il doit rendre le damage et à signeur V.s.; et qui le feroit de nuit il en seroit à C s., et se renderoit le damage double.

Qui autrui biestes6 bateroit, il renderoit le domage, et à signeur V s.; et qui les affolleroit, il en seroit à signeur à C s., et se renderoit le damaige.

Et s'il advenist que aucuns fuist blechiés ou mors de kars, de kerettes, de cherues, de molins, d'erces, ou là u on briese maisons ou lieve, et on le trueve en verité, que ces choses avinrent sans avis et sans volenté, de se sera-on sans damage envers le signeur, et sans wiere encontre le persone et ses parens.

Qui sur autre espanderoit vin, cervoise, ou aucun autre brouvage, de volenté, par fellenie, il en seroit à X s.; et qui feroit7 d'un pot, il en seroit à LX s., et se il saingnoit il en seroit à C s.

Qui voies fosseroit, ou terre d'autrui, ef on se plaindist, il en seroit à XL s.

Ef s'il advenist que enfens, qui fuist ou pain de se pere et se mere, meffisist, on ne porroit riens demander le pere ne le mere, ne n'en soroient encoupet8, si ne fuist ensi que apres ce fait retornast ariere à leur maison, par leur volenté, et par leur consent, ou qu'on puist prouver que ces enfens euist fait le fait par leur conseil.

Et se hons u femme voiloit mettre son enfant hors de son pain, ou enmancipier, il le puewent bien faire par droit, et celonc ce que li homme et li escevin en jugeront, et s'il est hons qui appartient a le maisnie dou signeur, on le doit monester par sa loyaulté et sa foy, et s'il est escevins on le doit monester par son sairement; et s'il n'est ne l'un ne l'autre, donc le doit-on faire qu'il ne met son enfant hors de se pain; pour nul lui faire grief ne damaige enconvient qu'il soit hors de son hostel, an et jour, et apres le puet-il leuwer9 comme un estraingne.

La u aucuns demoure mors, apres celle heure qu'il est mors ont tout li descoupables truiwes, wit jours et wit nuis, et apres maintenra cescun sa wiere.

Nus ne puet garbe1 en la dite baillie, fors li ballius devant dis, qui puet son droit faire, comme en la maniere qu'il a uset jusques à ores, selonc sa droiture, et li messiers qui garde les blés, selonc sa droiture; qui ailleurs garbes donroit, fors à chials2 qui chi deseure sont nommez, il seroit à XX s., et qui le demanderoit à XX s.; et se le doit li sires oster de son service, s'il y est.

Apres volons Nous que no senisaul, nos baillius, ne nos justiceurs de nullui riens prendent, outre jugement, et volons que nuls, nostre senisaul, nos baillius, ne nos justiceurs, ne nos forestiers, ne autrui, à leurs oels ne donist nul don, ne face service, pour droit faire, ne pour droit delayer; et s'il aucun don retenissent d'aucun, u se aucun leur feist service pour ceste cose, il le Nous desist, et Nous li rendrions, u ferions payer à doble; et ki ce ne feroit, il airoit fourfait corps et avoir.

Nulle gent d'ordene, ne bourgois, de dehoirs nostre terre ne de dedens, ne puewent acquere biens hiretauls de souls Nous, se ce n'est de nostre congiet.

Qui arbres sans3 trop pres du chemin, dont aucun se deplaint, et on le trove en verité, li sieres le puet faire couper à son oels, et parmi ce est li hons quites, et li sires fera l'homme le chemin descombrer.

Qui des hommes et des escevins a contredit doit-on amendeer, ensi que on a de cet uset. En droit4 des ajournemens, plais, et de toutes autres coses fera-on ensi que droist est.

Quiconques appartient à St Pierre de Lovaing, ou à notre franche maisnie, quant qu'il promet devant eskevins de nostre terre, volons qu'il tiengne, si comme il le uissent enconvent devant eskevins de franke ville; et en autres coses doyent goyer de leur franckise de le maisnie, ensi comme les gens saint Pierre doyent goyer.

Là u on doit faire enqueste, soit de petites choses u de grandes, on le doit faire proclamer à dymence, ou moustier, à le messe, et li sires le fera faire le lundi apres en celle samaine, à son loisir; et à celle enqueste faire doient estre et scoir5 deus eskevins u homme, u plus, u ambedus6 se mestier est, et avoec les justices; et la u on fait enqueste de petites choses, qui a premiere enqueste ne vient, il est à II s.; et s'il ne vient à l'autre enqueste, de celle mesme cose, il est encore à II s.; et s'il ne vient à le tierce enqueste de celle meisne cose, donc est-il coupauble dou fait de quoi li enqueste est faite. Cose, qui en appiert7 est faite, doit-on prouver en appiert, c'est assavoir par veir et par ouwier8 par eauls deux u plus9, et c'est plainte attente10. Che ke nient en appiert avient, u par nuit, et ne prouvera-on nient en appiert11, et se par eauls deux u plus; et si le prendent sur leur sairement ke chiauls est coupauble, sur cui il tesmoignent, doncques est celle plainte atteinte. Et la u on fera enqueste de grans fais, qui vont sur vie d'omme, ki a le premier enqueste vienient12 il est à XX s., et si vienient à l'autre enqueste de ce meisme fait, il est encore à XX s., et si vienient à le tierce enqueste qu'on fait sur celle meisme cose, donc est il coupaubles de ce meisme fait, sur quoy ly enqueste est faite, si n'est hoirs dou pays, u malade, u en mortel wiere hors truwes, ou pris, ou qu'il euist loiaul soigne13; et ottel14 doit estre de petits fais.

Qui on appelle et apparolle d'aucun meffait, ke on puet à le veritet prouver, il se doit escondier15, luy tierch, de genz créaubles, si n'est ensi qu'il est estraingnes, et adonc doit-il jurer en

sains deux sairemens, qu'il ne puet avoir nulle ayde pour luy ascondier, et pour le tierce fois doit-il jurer qu'il est descoupaubles dou fait, de quoy il est appellés.

S'il avient que aucuns se deffent dedens sa cort, ou en sa maison, u là u il est abbaities1 par abbait, et si se deffent, et en deffendant sou corps il aucun touwe2 ou bleche, chius qui son corps deffent est quites dou signeur, et sans wiere des amis et parens.

Et Nous commissons à nos homes qui d'endroit doient avoir leur coust, quant il vienent en nostre service, ensi que nos ancisseurs et Nous avons fait jusques à ores, et leur devons de droit.

Apres volons que moisnes, nonains, prestres, et toutes manieres d'ordene, lombars, juis, de nos terres, soyent en nostre warandes; de ce que on meffait eauls, ce doit estre à nostre volentet.

D'apres, aluefs3, fiefs, et hiretage doit-on proclamer à vendre, ou moustier, par trois quinsaines, le dimence à le messe, et apres qui entre festire4 et signeur ne vient, il ne peut avoir nulle premieté à ces biens, s'il n'est hoirs dou pays, ou euist loyaul ensogne.

Apres volons que les eskevins et desmainiers5 qui vont querre jugement, que cascuns, qui vat à piet, doit avoir le jour XVIII deniers, pour ses despens, et qui chevauche doit avoir le jour III s. pour ses despens, et qui les mainet à piet III s., et à keval IV s.

Apres volons que tont li camp de battaille6 demeurent, en ottel point que il ont estet jusques à orre.

Et apres volons pour toutes choses declarer, dont on poroit doubter, que quiconques ara fourfais ses biens, s'il a femme u enfans, Nous volons que li moitiet des biens demeurent à le femme et auls enfans, et l'autre moitiet à le volentet du signeur; et si n'a femme ne enfans, doncques volons Nous que tout si bien soient à la volentet du signeur, et à sa merchi.

Et si fuist ensi que hons ou femme, de dehors nostre terre, venist demourer desoulz, Nous volons qui puissent goyer de leur frankise, et chil qui venront d'eaulz, ensi qu'il gouississent s'il fuissent demorés en leur pays, si le puewent prouver; ensi que drois enseingne, par cheauls de leur droit estoch.

Et s'il advenist aucuns poins, qui ne fuist mie chi dedens escrit, ce doint-on mener par hommes et par eskevins, selont les poins plus samblables à chials qui chi dedens sont escrys, et à tel droit, comme chi est escrit, volons Nous que on tiegne par toute nostre terre, là jusques ores loys ne jugement ne estet7.

Apres volons Nous que liballius de Nyvelle ait VI varles à kevals, et IX à piet, et nient plus.

Et s'il avenoit que chils, qui aroit meffait, ne requist truwes, à le noe8 que li fais sarat fais, u à le jour que les truwes isteroient9, u anchois10, il averoit furfait à signeur XXX liv., hors mis toutes gens qui nous paient taille, et nos gens de no maisnie, qui Nous font frans service, et chil seront quite parmi XX s., s'il ne requisissent truwes, et toutes autres gens payeront XXX livres, s'il en deffeallent11 si que dit est.

Apres, chius qui villains fait a fait, par quoy il s'enfuit hors du pays, se plus proisme12 doit requere les truwes, si le est congnissaules13, et si dist qu'il ne li est mie cognissaules, doncques le doit li sieres sur lui prouver, ou metre sur son sairment.

Apres volons, qui autre apparolle en droit, et apparolle en deplaindant de li, de quelconques fait

qui l'apparole, et chius sa plainte ne puist ne mettre en verité, que li deplaindans soit en autel point que li autres euist esté, s'il fuist venus à desouls de sa plainte.

Apres volons que chius qui meffait, qu'il mesmes l'amende, et ke nuls ne payeche paye1, ne d'endroit de nous gens taillables, et de nous gens de no maisnie, qui Nous font frans service.

Qui autrui manache2 il a fourfait à signeur X liv., se on le puet prouver en veritet, et se doit assegnier celi cui il a manechiet.

Et se aucuns navials3 fais avenissent en no terre, qui ne poisent estre bien declareit par les poins chi dedens escrit, doit-on mener par nostre conseil de noz hommes.

Apres volons ke nuls de nos baillius, ne de nos justicieurs, ne puist chause ne querelle accater4, ne acquere, à temps ne à l'eure qu'elles soyent en plait u en calinge.

Apres, tous noz justicheurs de la dicte baillie metterons Nous à nostre volentet; et quant nos gens poront monstrer que no baillie, nos maieurs, u nos forestiers, font encontre les poins chi escrits et nommez, donc doient-il estre ostés de nostre service, et ne seront jamais baillius, maieurs, ne forestiers.

Et avons encovent ke Nous jamais senisaul, bailliu, maieur, amant, scoutheit, ne ferons, pour argent, u biens, qu'il Nous presteront, u prometteront.

Apres volons, que quant on commande l'ost en no terre, et nos gens communement issent, que nuls ne demeure à l'ostel, se Nous ne li donnons congiet, meismez de nostre bouche, u nos seurains baillius de Nyvelle; et chius qui outre ce demoiroit à l'ostel, il et se bien seroient à nostre volentet; et se aucuns de nos justiceurs donnoit à aucun homme congiet, se ce ne fuist de nostre volontet, u se ce ne fuist no deseurains baillius de Nyvelle, il aroit à tous jours furfait nostre service5.

Et Nous Jehans, par la grace de Dieu, etc.6.

Cartulaire, coté no 3 à l'inventnire des registres de l'ancienne chambre des comptes, aux archives du Gouvernement, à Bruxelles.

Vorige Volgende

Over het gehele werk

landen