Rymkronyk van Jan van Heelu betreffende den slag van Woeringen van het jaer 1288

CXXIII. 18 décembre 1288.

Lettres de Guillaume, évêque de Cambrai, par lesquelles il commet Guillaume de Flandre, afin d'insister auprès du duc de Brabant pour l'accomplissement de ses promesses.

Nous Willaumes, par le grace de Dieu eveskes de Cambrai, faisons savoir à tous ceaus ki ces presentes lettres veront et oront, ke coume nobles hom Jehans, par le grace de Dieu dus de Lothr. et de Braibant, de tous debas, de le wiere et de tous contens, ki sunt et ont estei entre lui, ses aidans et ses aloiés, d'autre part, et Renaut conte de Ghelre, ses aidans et ses aloiés, d'autre part, et de toutes les avenues ki pour celi chose avenues sunt, se soit mis de haut et de bas en no dit et en no ordenance, einsi comme Nous en vorrons¹ dire et ordener à une fois u à pluseurs, et pour le dit duc reverens peres en Dieu me sire Jehans, par le grace de Dieu eveskes de Liege, et noble

1 Vorrons, voudrons

[p. 481]

homme me sire Phelippes d'Artois, me sire Godefrois de Braibant, me sires Nicholes de Condet sires de Moriaumes, et me sire Gilles Bertaus, chevaliers, nos aient enconvent, k'il feront le due devant noumei tenir entirement toutes ces choses de lui proumises, si comme il apert par les lettres de ces persones devant dites, saielées de leur saiaus. Et sour ce Nous aiemes aucunes choses dites et ordenées, entre les queles Nous par no dit et par no ordenance aiemes engoint au dit duc, k'il dedens certain terme ja passeit et en certain liu nos delivrast et mesist en no main le devant noumei Renaut conte de Ghelre, pour faire ent no volentei, selonc ce ke boen nos sanleroit, et aienmes requis à mon segneur de Liege et as devant noumeis mon segneur Godefroit, mou segneur Nicholon de Condeit et mon segneur Gille Biertaut, k'il selonc lor convenance fesissent le dit duc tenir entirement no ordenance devant dite, de le quel chose faire li dus et les persones devant noumées sunt del tout en defaute, pour ce ke Nous soumes enpeechiet de pluseurs grans besongnes, nous metons et estavlissons en liu de Nous, et faisons certain procureur, no chier cousin mon segneur Willaume de Flandres, en toutes les choses devant dites et li donnons plain pooir de poursivir, pourchaceer, requerre, esploitier et metre à oevre envers le dit duc, et toutes les persones devant noumées et chascune par li, tout ce k'il vera ke boen sera à faire des choses devant dites, par quoi ces convenances et no ordenance, faite einsi comme dit est, soient tenues et acomplies, et li donnons encore plain pooir de pourchacier, requerre, demander et rechevoir toutes les convenances, ke li dis dus et cil pour lui en sont obligiet ont envers Nous, des choses et des avenues devant dites et de chascune a par li; et volons et bien nos plaist; ke li dis me sire Willaumes dou pooir ke Nous li avons douneit puist toutes ces choses et chascune par li pourchacier et esploitier envers les dites persones et chascune par li, soit en fourme de plait, soit en autre maniere, tout einsi, conme boen li sanblera, et donnons encore pooir au devant dit mon segneur Willaume de metre en son liu une persone u pluseurs, ki aient ces meismes pooir, ke Nous li avons donnet en toutes les choses devant dites, et de rapieler le pooir des dites persones et remetre autres en lor liu à une fois u à pluseurs, ki aient ce meismes pooir en tout u en partie, tout einsi ke boen li sanblera, et toutes les fois k'il vorra. Et avons ferme et estavle tout ce ke li dis mes sires Willaumes, u les persones k'il metera en son liu, feront, diront, et esploiteront des choses devant dites. Et faisons no retenue de poursivir les choses devant dites, en tout u en partie, par Nous u par autrui, toutes les fois ke boen nous sanlera, sauf ce ke tout ce ki sera fait par mon segneur Willaume, u par ceaus k'il metera en son liu, soit et demeurt ferme et estable, et durra li pooirs de ceste lettre dusques à no renon. En tiesmoingnage des quels choses Nous avons ces presentes lettres saielées de nostre saiiel, ki furent faites et données en l'an de grace mil deus cens quatrevins et wit, le samedi apres le fieste sainte Lusse.

L'original, muni du sceau en eire jaune, aux archives de Gueldre.