Rymkronyk van Jan van Heelu betreffende den slag van Woeringen van het jaer 1288

LXXI. 5 août 1286.

Alliance entre Jean, duc de Brabant, et la ville de Liége.

Nous Jehans, par la grasce de Dieu dus de Lothricke et de Brebant, et Nous li maistre eschevien juret, et toute la communiteis de la chiteit de Liege, faisons à savoir à tous cheaus qui ches lettres verront, que Nous avons, entre Nous, fait teis convenances et ordenances, ki chi desous sunt escriptes. A savoir est: Que Nous Jehans, dus devantdis, avons pris et prendons les citains de Liege et lor biens en nostre conduit, par toute nostre terre et nostre pooir. Nous les maintenrons et aiderons maintenir en droit, en loi, et en leur franchises, si avant ke li eschevins de Liege warde leur lois et leur franchises; et aiderons les estatus de lor ville, leurs privileges, leur maniemens,

[p. 442]

leur usages maintenir et wardeir. Et se il lievent as venanlz¹ ke om vent en la ville de Liege, les freis des pons, des chauchies, et des murs, quant besoins sera, et les autres freis de leur ville, en leur bourses, à toutes lais persones, manans dedens Liege, forsmis varles de clers, manans en osteis de clers, si avant ke li eschevins de Liege a jugiet et wardé, Nous leur en serons aidans en tele maniere, que s'il avenoit cose ke li evesques ou les eglises de Liege, ou ambedui emsemble, ou aucun d'elles, ou des personnes des dites eglises, les grevoent encontre ce que deseure est dit, en tout ou en partie, Nous aiderons les deseurdis citains, en ces coses, et par arrest des biens de clers deseurdit, et en toutte autre maniere, à nos pooirs; Nous warderons les devantdis cytains, de force, encontre l'éveske et les dites eglyses de Liege, et encontre leur aiies, ki les aideront encontre les dis citains, ens es cas deseurdis. Et se akuns discors avenoit en la citeit, Nous seromes adès aidans à la partie ou li dui maistre dela dite citeit soi tenront; Nous venrons ades au mandement des dois maistres dela citei, se Nous n'aviens dont loyal ensonge²; et se nous avons loyal songe, Nous i envoierons de nostre conseil souffisaument, et de nos gens à armes, ou sens armes, ensi ke besoing lor sera, adone et ensi que il Nous manderont à leur const kant ce sera pour les besoignes de leur ville. Et se il Nous mandent en akuns tens ke Nous venons en leur aiie, à tout nostre ost, Nous venrons à nostre coust: et à donc chil de Liege Nous aideront à leur pooir, à leur coust, ens el cas deseur dit.

Et Nous, li maistre eschevin jureit, et toute la communiteis de la citeit devantdite, connissons le duc deseurdit à nostre haut avoweit; et s'il avient ke li dis duc aquiere le vowerie, ke Baduins de Beaumont tient à Liege, dedens douze ans venans prochainement, Nous li ferons d'aiie³ trois mille livres de Lovengnis, petis vius, dont li troi valent un esterlin de Brebant, et juskes à donc, Nous li donrous cascun an trois cent livres de petis Lovengois devantdis. Et se li devantdis dus n'aquiers ladite vowerie, dedens les douze ans devantdis, Nous adonc metterons ces trois mille livres par son conseil en un liu seur, dedens Liege, à oes⁴ dou duc, et pour tant Nous seromes quite des trois cens livres devantdis par an. Et de ces trois mille livres li Dus devantdis doit acquerre hyeretage dedens Liege, et de donc enavant leveir la rente achatàe de ces trois mille livres; et doit li Dus devantdis tenir la vowerie devantdite, se il l'aquiert, ou la rente achatée de ces trois mille livres, tant ke li vivera, et apres li, si oir, duc de Brebant, et uns autres. Et s'il avient ke li clerc de Liege, pour l'arest de leur biens; se li dus le fait, à la requeste des dois maistres de Liege, enplaident le duc, par sainte glise, Nous l'en ferons d'aiie cascun an, tant que chilz plais durera, cent livres de petis Lovingnois devantdis.

Et Nous Jehans, dus devantdis, se Nous ou nostre oir aquerons le vowerie Baudewin de Beaumont, devantdit, en akun tans, Nous, ne nostre oir, ne porrons demandeir à cheaus de Liege, pour le raison des voweries deseur dites, plus avant que li eschevin de Liege warde que voweis⁵ doit avoir à Liege. Et les quitons parmi ces convens touttes autres promesses et touttes convenances, ke il fait ont à Nous, ou à nous devantrains⁶, s'akune i a, pour le raison d'aquerre le vowerie Baudewin devantdite. Et les avons enconvent, par foid et par sairement, de wardeir

1 Se il lievent as vennals, s'ils lévent, s'ils exigent des droits sur les étoffes.

2 Ensonge, empêchement.

3 D'aiie, par aide.

4 A ocs, au gré.

5 Warde que voweis, assure que l'avuué.

6 Devantrains, devanciers.

[p. 443]

bien et loialment ces convenances deseurdites, et obligons nos oirs, apres Nous dus de Brebant, de tenir et de wardeir ces meismes convenances, et ke il les renovellerunt dedens l'an, ke il venront à la terre de Brebant, se il sunt à eage; et se il ne sunt à eage, leurs mamburs les doit renoveleir dedens cel an, et il meismes, quant il seront à eage, les doient renoveleir; et se il nelle faisoient ensi, comme dit est, se il n'avoent dont loial songe, il seroent priveit delle vowerie Baudewin deseurdite, s'aquiese estoit, ou delle rente ki aquise seroit de trois mille livres deseurdis, et revenroit la vowerie ou celle rente, ensi acquise, à cheaus de Liege, et seroient touttes ces convenances anientiies.

Et Nous, li parties deseurdites, avons promis et prometons loialment et en bonne foid, de tenir et de wardeir les convenances deseurdites, sens venir encontre, par Nous ou par autrui, en nul tens, en tout ou en partie. Et pour itant que le soit plus ferme et plus estable cose à tous jours, Nous, Jehans dus, et li maistre eschevin jureit, et toutte la communiteis de Liege, devant dit, avons penduis nos sailaus à ceste lettre. Et Nous Jehans, dus devantdis, prions nos chiers foiables Godefroit, nostre chier frere, et nos bonnes villes, Louvaing, Brusielle, Angwiers¹, Thillemont et Lieuwes, qu'il pendent leur seals à ces lettres, pour Nous. Et Nous Godefrois, et les bonnes villes deseur dites, à le priere de nostre chier signeur devantdit, avous pendus nos saials à ces lettre, en teismoingnage de veriteit.

Che fu fait et donneit en l'an de Nostre Signeur mil deus cens quatre vins et sijs, le lundi apres le fieste Sainte Piere, aoust entrant.

Cartulaire des ducs de Brabant, B, fol. 66, recto.

1 Angwiers, pour Antwerps, Anvers.