Sranan Anansi tori

[p. 23]

Dagu, Krabita nanga Tigri

We, a tori fu Dagu, Krabita nanga Tigri waka so. Tigri ben wani nyan Krabita, dan a meki mofo nanga Dagu fu tyari Krabita kon ini en oso. Dan drape den bo nyan Krabita. Di Dagu doro nanga Krabita na Tigri oso, Tigri breiti sote. Tigri meki Dagu poti wan patu watra na faya. Bika te a watra ben kon faya nofo, dan Tigri bo saka mati Krabita go na ini. Dan a bo man krin en. Dan en nanga Dagu bo prati en.

[p. 24]

Ma ala yuru te Dagu e sidon, Tigri e seni en taki: ‘Go luku efu a watra faya.’

Ala yuru te Dagu go, ai kon baka, ai taki: ‘Mi tata Tigri, a no faya ete.’

Den e sidon e taki wan tori nanga Krabita fu a no abi wan prakseri taki wan sani no bun. A so ai go, a so ai kon, den e sidon. Tigri luku Dagu, a taigi en taki: ‘Go luku gi mi efu a watra faya.’

Ma a sani dati no ben bun gi Dagu moro. A taki: ‘Go yu srefi now, man. Ala yuru yu e seni mi go. Mi weri fu waka.’

Ma san yu denki dan? Dagu sidon, a ben luku Krabita nanga sari. Now di a puru Tigri na en tapu fu go luku a watra, Dagu kisi a okasi fu lon gwe nanga Krabita. Fa yu si Tigri gwe na bakagadri fu go luku a watra, nomo Dagu teki Krabita. Den e lon, den e lon, den e lon, den e lon, den e lon.

A ten Tigri kon na insei a no si Krabita, a no si Dagu. Tigri sabi wanten san psa. En ati bron, en ati bron sote dati en blo e suku fu gwe libi en. Tigri lon kmopo ini a kampu. Ai lon, ai lon, ai lon. A poti en ede go ini a smara pasi, waka go na ini a busi. Ai fadon, ai opo lon. Ai fadon, ai opo lon. Tigri e lon, Tigri e lon. Di a lon kon na wan pisi, a si taki Dagu de na abrasei fu wan kriki.

Ma san yu denki psa? Dagu now sabi taki Krabita no man koti a kriki abra. Dan a taigi Krabita taki: ‘Yere, Krabita, san mi o du. Mi o diki wan olo. Dan

[p. 25]

mi o poti yu na ini, èn mi e go tapu yu nanga santi. Ma den tu tutu fu yu, dati mi e go libi na doro.’

Krabita taki: ‘A bun.’ Na so Dagu du. Dan Dagu koti a kriki abra, a tnapu a abrasei.

Hè! So, di Tigri e lon psa, a si wan kriki na en fesi. A fringi en ai na abrasei so e luku. A si Dagu. ‘Yu boi, Dagu! Yu boi, Dagu!’

Dagu taki: ‘Iya, mi tata Tigri?’

Tigri taki: ‘Sanede yu e du dati? Pe Krabita de?’

A taki: ‘Mi tata Tigri, mi denki Krabita go na busi, yèrè.’

[p. 26]

Tigri taki: ‘Yu boi, efu mi kisi yu...’ En ati e bron sote taki ala den wiwiri fu en skin tnapu. A taki: ‘Efu mi kisi yu, mi boi, mi e go kiri yu.’

Dagu taki: ‘Mi tata Tigri, yu ati e bron, no?’

Tata Tigri taki: ‘Ai, efu mi kisi yu...’

Dagu taki: ‘We, mi tata Tigri, efu yu ati e bron dan i mus sori mi taki yu ati e bron nanga mi. Luku tiki de drape. Fringi a tiki naki mi.’

Fa yu si nanga ala krakti Ba Tigri bukunu hari den tu tutu. A denki na tu pisi stompu. A hari den fringi go na abrasei. Nomo Krabita dyompo na tapu en futu. A bari: ‘Mèè, mèè!’

Tigri ben kan dede. Tigri taki: ‘Yu boi Dagu, awasi pe mi sa miti unu, mi sa kiri unu.’

A dati meki te nanga a dei fu tide, Tigri nanga Dagu nanga Krabita no man tan makandra. Awansi pe Tigri sa miti Dagu, ai go priti en. Èn awansi pe Tigri sa miti Krabita, a sa priti en tu. A so a tori fu Dagu, Krabita nanga Tigri waka.

[p. 27]