Goddelicke lof-sanghen

[p. 44]

[p. 45]

Ouer-settinghe van Salue Regina.

¹GHegroet weest Coninghinne,
Die Moeder sijt vol van ghenaed’ en minne,
Weest oock ghegroet soetheydt, en leven,
Die voor ons sijt// een hope altijt// ghegheven.

²Tot u doen wy ons stemmen
Schoon-suyuer Bruyd dagh ende nacht op-clemmen,

Woelend’ hier, laes! onder Gods thoren,

Als kinders quaet// uyt Adams saet// gheboren.

³Tot u ist dat wy vluchten:
Tot u ist dat wy quelen, ende suchten:

Want ons gheensins en kan ghereyen

Dit dal waer d’oogh// nooyt en is droogh// van schreyen.

⁴Wel aen schoon uyt-ghelesen,
Om by den Heer ons tael-Vrouwe te wesen:

Ghehinght u ons bermhertigh ooghen

Uyt uwen throon// als Sonnen schoon// te tooghen.

⁵En laet oock eens ghedijen,
Dat wy verlost uyt ‘tiock der slaeuernijen,

Iesum aensien onsen behoeder,

Die ghy ter aerdt// ons hebt ghebaerdt// als Moeder.

⁶Maria vol van vrede,
Vol sachten moed, en vol god-vruchtichede,

Maria soet, tot wie wy vlieden,

Laet dese vreughd// tot onser deughd// gheschieden.

1 Salue Regina mater misericordiae, vita, dulcedo spes nostra, salue.

2 Ad te clamamus exules filij Euae.

3 Ad te suspiramus gementes flentes in hac lacrymarum valle.

4 Eia ergo Aduocata nostra, illos tuos misericordes oculos ad nos conuerte.

5 Et Iesum benedictum fructum ventris tui nobis post hoc exilium ostende.

6 O clemens, ô pia, ô dulcis virgo Maria.