Rimen en teltsjes

In nij liet op Grouster merke
Voais: Het zal wel gaan, wel gaan, wel gaan vanavond in het schuitje.

Toe lis mar, lis mar, lis mar oan,

Us mem dy wol 't wol lije.

Hja sei tsjin heit: ‘Wy ha 't wol dien;

Us Tryn mei ek wol frije.’

Strak sille wy skotse,

Trala, la la, tra lalderala;

Strak sille wy skotse,

It keallebout ropt ús ta.

Us omke het it jak al oan;

Dêr sit de man te bazen;

Hy het it by syn wiif ferdoarn;

O wee, wat sil se raze!

Mar omke en muoike

Dy bruie ús allebeide net.

Wy sille mar skotse.

Wat haww' wy hjoed in pret.

In âlde, âlde, âlde prûk

Mei no noch gnoarje en stinne.

De faam en feint dy krûpe oan,

En litte it gleske rinne.

Kom, litte wy sjonge,

Trala, la la, la lalderala.

Kom, litte wy stampe;

De hospes wol 't wol ha.

No romte, romte, romte mar!

Wy fleane nei de Buorren.

Dêr stean twa feinten yn 't Grien

Te fjochten en te skuorren.

Wy sjonge leaver

Trala, la la, la lalderala.

Wy patsje de fammen,

En sûpe astranta.