Rimen en teltsjes

Sets en Tsjerk yn Snitser merk
Wize: O Bogchel gy pareert altijd.

Kom, Setsleaf, ik wurd oars yn 't liif,
Ik wol dy graach ris patsje,
Dy stoe de mûle 'er lang al nei,
Ik sjen 't, myn leave skatsje.

Kom, faam, sei reade Tsjerk,

Dû moatst mei my te merk,

Dan sill' wy jûn ris skotse,
'k Ha tweintich skeljen yn 'e bûs,
Dy ha 'k fan omke Watse,
Dy het se by de rûs.

En Setske fleach him om 'e hals,
En hâlde as in kladde,
Ei fanke!, sei hy, lit my los,
Dû pattest my oan flarde.

En dêrmei pearen op

En Tsjerk sprong mei syn pop.

Sjoch, feinten, sjoch har springen,
Hja lykje poer as yn 'e brân,
Hja dûnsje as hokkelingen,
Te maitiid yn it lân.

Toe, spylman!, mei dyn kealleflesk,¹
Dû moatst no fiks opstrike,
Fan dûnsjen krij ik noait myn nocht,
Al duorret it in wike,

In glêsfol brandewyn,

Jit ik 'er earst mar yn,

Hjir, hospes, hjir moatst wêze,
Ik moat in ynswiet sûpke ha,
Sok guod kin my genêze,
Us sûpe en waai bin 'k ba.

'k Moat simmers altiid yn it mêd,
En winters yn 'e groppe;
De kowestront bin ik no sêd,
En hâld it mei myn poppe;

Kom no ris fan 'e grûn,

Kom, famkes! no yn 't rûn!

En is it jild fersprongen,
Dan moatt' de hoeden fan 'e kop,
En oars foar lege pongen:
Stryk op! stryk op! stryk op!

Master Jouke

1 Dit is de viool waarop gespeeld wordt.