Rimen en teltsjes

Seemans klachte (It wurdt songen as In einem kuhlen grunde, Da geht ein muhlen etc.)

Moai Etke fan Teroele!

Wêr ik ek sit of rin,

Do brochtst my op 'e doele,

Do bist net út myn sin.

Dêr yn dy stille hutte

Ticht oan dy wetterswâl,

Dêr siet ik, sleauwe Tutte.
Wat wiene wy dan mâl!

Fan dat de jûnklok lette

Tadat de ljurk al song,

It soe ús noait fertrette,

Do suchtste as ik gong.

Och, as minuten rûnen

Dy oeren dan foarby.

O, leave, hill'ge jûnen,

Hoe sillich wien' se my!

'k Joech har in ring op trouwe,

En swarde in eed 'erby.

Ik woe 'r in toer op bouwe.

Hoe rêd fergeat hja my!

No mei ik floitsje of sjonge,

Ik krij it dochs net oars,

In rike boerejonge

Giet foar in earm matroas.

Mar 'k wol net langer kleie:

Ik swicht net foar it jild.

'k Wol as in ruter jeie

Oer 't bloedich oarlochsfjild:

Wêr hege seeën geane,

Nei 't fiere westen ta,

Oer wylde weagen fleane

Nei 't frij Amearika.

[p. 294]

 

 

 

Moai Etke fan Teroele!

 

Sjoch, ik fersto as tsjêf.

 

Do brochtst my op 'e doele;

 

Ik siikje om myn grêf.

Grou, 3 jannewaris 1851

e.h.