Rimen en teltsjes

Skipperssankje

Ferjit my net as bolle wyntsjes waaie,

En ik oan 't roer myn sankje sjong;

As kroeze weagen 't glêde skip omaaie;

Ferjit my net.

Ferjit my net as millioenen stjerren,

En 't freonlik moantsje my beskynt;

En do swiet droom' hest yn 'e sêfte fearren;

Ferjit my net.

Ferjit my net as wrede touwerfleagen

My slingerje dêr God it wol.

As ik ompolskje mei de dea foar eagen;

Ferjit my net.

Ferjit my net, as wreed de stoarmen bylje,

En 't libben hinget oan in tried;

As wy ferslein oan 't needtou ride en fylje;

Ferjit my net.

Ferjit my net as swarte tommelweagen

Oertrûzelje it warleas skip,

En alle eleminten tsjin ús teagen;

Ferjit my net.

Ferjit my net as w' einling jit fersinke,

En teare yn 'e djippe see:

Wol dan mei triennen om my tinke;

Ferjit my net.

e.h.