Liedekens ende Refereynen Ghemaeckt by Haerlem Soetendal, van zijn Avontueren

Een nieu Liedeken, van een Meester ende knecht.

Opde wyse: de Mey, de Mey, etc.

M. WAer mach den drayer blyven
Erghens op een gelach
K. Begint ghy alree de kyven
God gheef u goeden dach
Ic was ter Messe,
Ten is maer sesse
Wat hy doch klaghen mach.
M Ghy moet doch vroegher komen
Ten vijven is de eur,
K. Dan ben ic met verschromen,
Te komen buyten deur
Het is so doncker
Wat let den proncker
Hoe siet hy nu so seur.
M Wat sal hem nu ghebreken
Hy spreeckt al even vrom
K. Soud' ick niet moghen spreken
Zo most ic wesen stom,
M. wats hier te krayen
Wel wilt ghy drayen
Zo draeyt het wielken om.
K. Te drayen al mijn leven
Dat maect mijn leden moe,
M. wel dunckt u beter tweven
So loopter weer na toe,
K. waer ick op steun
Tis cest tout un

[p. 19]

 

Also ick best bevroe.

 

M. Wat wilt ghy dan staen klaghen

 

Vant drayen oft Weven fijn,

 

K. Tis waer ic moet mijn daghen

 

Een arm wroetelaer zijn

 

M. Ick moet ooc wercken // tot mijn verstercken

 

Al ist my dicwils pijn.

 

K. Ghy banct tot u verfrayen

 

Goe kost Edelen traen

 

M. Wel wilt wat ras om drayen,

 

So sult ghy thuyswaert gaen

 

K. Daer sal ic krygen, En moeten zwygen,

 

Ayun qualijc gebraen

 

M. Aet ghy soo wel als icke,

 

So wiert ghy veel te wilt

 

K. Het blijct wel by de sticke

 

Dat al te vele schilt

 

Siet hier mijn Kaken // mager als staken

 

Gelijc een houten bilt.

 

M. Ghy meucht het Ambacht leeren,

 

Ghy zijt kreupel noch manc

 

K. Wouden zijt my vereeren

 

Maer eyschen tijt te lanc

 

Drie oft vier jare, Ic seght u klare

 

Dat maect mijn Kop te kranc.

 

M. Verscherpt morgen u sinnen

 

Ist dat ic u hier fael

 

K. So en sal ic niet winnen

 

mijn dobbelen Reael

 

m. Wilt niet verkloecken // dan werc gaen soecken

 

Op den Trap vant spitael.

 

K. Om na tSpitael te gane,

 

Daer toe ben ick te bloot

 

m. Ic vinder nochtans veel stane

 

Die hebben minder noot,

 

K. Het waeyter so koele // so ic ghevoele,

[p. 20]

 

Dat maeckt mijn Neus soo root

 

M. Ghy sout den uyl wel slachten

 

Sonders Kaers ofte Bril

 

K. Dat ghy my dus gaet achten

 

Wat is doch u gheschil

 

M. Kaers of Bril siet // En helpt hem niet

 

Als hy niet sien en wil.

 

K. Sint dat ic was gebooren

 

Is my sulcx noyt gheseyt

 

M. Ghy gheeft den moet verlooren,

 

Tschijnt dat ghy staet en schreyt

 

K. Alsulcke renen // vliegen so henen

 

Tis groove Christenheydt.

 

M. Den Prince van Orangien

 

mocht ghy wel gaen besien

 

K. By den Koningh van Spaengien

 

En kan ic niet bedien

 

M. Adieu bon heur, Zo gaet dan deur,

 

Wy willen niet meet strien.