Liedekens ende Refereynen Ghemaeckt by Haerlem Soetendal, van zijn Avontueren

Een afscheyt liet van Haerlem Soetendal, met zijn Huysvrou, aen hare Vrienden tot Lissebon,

op de wijse: Ick gingh op eenen morghen.

ADieu Lissebon schoone
Hooft-stadt van Portugael
Hoe wel ghy spant de Kroone,
Van d'ander altemael
Nochtans ick u verlaten sal,
Op hollant wil ic reysen gaen
Naer haerlem Soetendal.

Ic heb in dees twaelf Iaren,

Ghesien menighe Ste
Ghedient, ghereyst, ghevaren
Ghedraeyt, ghewoven mee

[p. 21]

 

Maer nu hoop ick te setten pal,

 

Ist dat my God laet komen

 

Binnen Haerlem etc.

 

Hoe wel daer vele segghen:

 

Wat komt u in den sin

 

Sy en gaen niet overlegghen

 

Mijn soberlijck ghewin

 

Dat ick in Lissebon hadde smal

 

Daerom so wil ick reysen gaen

 

Naer Haerlem Soetendal.

 

Adieu segh ic int scheyden

 

Die my hebben bemint

 

Godt die wil u gheleyden

 

Met mijn Wijf ende Kint

 

Bid God voor my ghy lieden al

 

Op dat ic doch mach komen, binnen Haerlem etc

 

Mijn vrou met groot gheweene

 

Schrijft haer Vrienden adieu

 

Mijn kint al is het kleene

 

het hout hem even nieu,

 

het singt, het springt met bly geschul

 

om dattet nu sal reysen gaen, Naer haerlem, etc.

 

tVolc segt my sonder schromen,

 

maer ick hout al int goe

 

Ghy sult noch weder komen

 

En wesen noch bly toe.

 

Ghelijck alsmen slaet den bal,

 

maer nochtans wil ic reysen gaen, Na haerlem etc

 

Waert dat wy weder quamen

 

Bloot naect ende ontdect

 

Ic bid u al te samen, my doch niet en begect

 

Want cond' ic raden al mijn misval

 

So en zoud' ic niet te reysen gaen, Nae haerlem etc.

 

Konden wy alghelijcke

 

Raden ons ongheluck,

 

Wy wierden haestigh rijcke

[p. 22]

 

En quamen noyt in druck,

 

Maer tis verlooren sulc een ghekal

 

daerom wil ooc reysen gaen // naer haerlem Soetendal

 

Ick heb in veel waranden

 

Mijnen nootdruft ghesocht

 

Met twerc van mijnder handen

 

Mijn cost altijt ghekocht

 

Van vetticheden ick nopt en zwal

 

God geef dat nu mach beter gaen,

 

Binnen Haerlem Soetendal.

 

Adieu schoone Iuweelen,

 

Int Lissebonsche pleyn

 

Kercken huysen Casteelen

 

Den Thooren van Beleyn

 

met u inwoonders wijs en mal,

 

Adieu nu wil ic reysen gaen, Naer haerlem, etc.

 

Volck van alle manieren,

 

Is daer hoort mijn bedien,

 

geen schoondere Revieren, en heb ic noyt ghesien

 

daer Schepen komen een groot ghetal,

 

daer ic nu deur sal reysen gaen, Naer haerlem etc.

 

Prince seer hoogh staten,

 

die hemel en d'aerde schiep,

 

En wilt my niet verlaten,

 

In de spaensche Zee diep

 

Brenght ons tot hollant aen de Wal

 

Dat wy u lof verbreyden gaen, In haerlem, etc.