Den lust-hof der Christelycke leeringhe

[p. 263]

Van de vyf sinnen.

Vra.

Hoe komt datter soo veel

Ghedachten in ons vaeren?

Ant.

Om dat wy meesten deel

Ons' sinnen niet bewaeren.

Vra.

Noemt der vijf sinnen choor,

Die dickwils sondaers maecken?

Ant.

1. 'tGhesicht, 2. Reuck, en 3. 'tGhehoor,

4. Ghevoelen, 5. ende Smaecken.

[p. 264]

Liedeken van de vijf sinnen.

Op de wijse:
Maria schoone Bruydt, schoon' Koninghin'.
Oft: als vooren pag. 263.

GOdt Schepper aller dinghen, u zy lof,
Die ons ghemaeckt van slijck en stof,

Boven't redeloos ghediert'

Met de reden hebt verciert.

Hoe seer is onse reden, Heer', verhooght,
Als ghy die maeckt des lichaems vooght!

En haer te bewaeren gheeft

Een' stadt, die vijf poorten heeft.

Ons lichaem is dat niet een stadt voorwaer?
De poorten, der vijf sinnen schaer'?

In dees' stadt de siele woont:

Door dees poorten sy haer thoont.

Maer, laes! den helschen vyandt loos' en quaed',
Neemt dese stadt in met verraedt,

Als de redelijcke kracht

Aen de poorten niet en wacht.

⁺O Heere Godt, bewaert dan mijn ghesicht,
Van yet t'aenschouwen dat ontsticht;

⁺Dat de doodt niet in en gaet,

Door de poort', die open staet.

⁺Wilt stoppen oock de poorte van 'tghehoor,
Dat achterklap daer niet gaet door;

Noch gheen vuyl oneerbaer woordt,

Dat ghehoort, de siel' vermoordt.

⁺O Iesv, die in uwe laetste pijn
Met gal ghelaeft zijt end' asijn;

Doet my schouwen overdaet,

En in't eten houden maet.

+ 1.
Sien.

+ Ierem. 9. 21.

+ 2.
Hooren.

+ 3.
Smaecken.

[p. 265]

 

Laet my dan oock het riecken, machtigh' Heer',⁺

 

Altijdt ghebruycken t'uwer eer'.

 

Mijn ghevoelen oock behoedt,⁺

 

Dat het toch gheen' sonde doet.

 

 

 

Mijn' handen, en mijn' tongh', en leden al'

 

Bewaert, Heer, van der sonden val:

 

Laet ick my versterven hier,

 

Om t'ontgaen het helsche vyer.

 

Iesv met vijf wonden aen 'tkruys doorwondt,

 

Doet mijn' vijf sinnen t'alder stondt

 

Volghen den oprechten wet,

 

Van de Reden hen gheset.

 

 

 

Oock van het quaed misbruycken my bevrijdt,

 

Dat ick met u magh zijn verblijdt;

 

Komende ter saligheyd,

 

Die uw' vrienden is bereydt.

+ 4.
Riecken.

+ 5.
Ghevoelen.