Den lust-hof der Christelycke leeringhe

[p. 262]

VVaerschouvvinghe om t'onderkennen ende te schouvven quade ghepeysen.

GHelijck een' meulen draeyt
De kracht van ons' ghepeysen,
Die met de winden waeyt
En keert haer t'allen reysen:
Let wel wat graen dat heeft
Dees' meulen in-ghehaelt;
Want sulcks als ghy haer gheeft,
Sulck is't meel dat-se maelt.
Peyst ghy van lecker-beet,
Oft van oneerbaer' saecken;
Toe-stemt ghy't, als ghy't weet;
Het sal u sulcks oock maecken.
Der voghelen vlught snel'
En kondy niet beletten;
Op u huys kondt ghy wel
Doen, dat-se gheen nest setten:
Soo kondy niet ontgaen
'tInvallende ghedacht;
Maer wortelt het voort aen,
Dat is in uwe macht.
Verbeeldinghs in-val kondt
Ghy toestaen, oft verjaghen.
Hier dan beghint de sond';
Beghint het te behaghen.
Hierom een quaed ghedacht
Wilt stracks van u verdrijven:
Neemt ghy daer op gheen acht;
'tSal licht'lijck by u blijven:
Slaet't af voor d'eerste reys';
Oft wil't u niet begheven,
Wat anders denckt: 'tghepeys
Werdt door 'tghepeys verdreven:
Gheen' twee dinghen ghelijck
In ons' ghedachten staen:
Peyst dan wat Goddelijck,
Soo sal 'tquaed van u gaen.