De Psalmen Dauids

Vande Gheboorte Christi.

Op de voorgaende Melodie.

1

EEn kindeken soo louelijc
Is-ons gheboren heden,
Van eender Maghet suyuerlijc,
Tot troost ons armer leden,

Waer ons dit Kint gheboren // niet,

Soo waren wy verloren // siet:
T'is ons aller Heyl goedich,

O ghy zeer soete Iesu Christ,

Dat ghy mensch' gheworden bist:
Hoedt ons voor de Hell' gloedich.

2

De tijt die is nv vreuchden-rijck
Om Godts naeme te louen,
Dat Christus op der aerden wijck
Is comen van daer bouen:

Het is voorwaer een groot' ootmoet

Die Godt vanden Hemel ons doet,
Hy werdt een knecht volcomen,

Sonder alle Sond' ons ghelijc,

[p. 70]

 

Daer door wy worden eewich rijc,

 

Heeft ons sond' wech ghenomen.

3

Wel dien die van dit gheloof' is,
End' can heel vast betrouwen,
Die crijcht de Salicheyt ghewis:
Wel hun de daer op bouwen,

Dat Christus heeft ghenoech ghedaen,

Daer-om soo is hy wt-ghegaen
Van Godt Vader Almachtich,

O wonder bouen wonder-daet,

Christus draecht onse misdaet quaet,
End' stilt onsen twist crachtich.

4

Het danck' hem alle Christenheyt,
Voor sulcken grooten goeden,
End' bidde zijn barmherticheyt,
Dat hy ons will' behoeden

Voor valsche Leer' end' boosen waen,

Daer-in wy hebben langh' ghestaen:
Hy wil ons dat vergheuen.

Godt Vader, Soon', Heylighe Gheest,

Wy bidden van v aldermeest,
Laet ons in vrede leuen.