De Psalmen Dauids

Vanden H. Doope. D.M.L.

1

CHristus tot de Iordane quam:
Na zijns Va-

[p. 50]

 

ders ghenoegen

 

Van sint Ian hy de doop aen-nam,

 

Om zijn werc te vol-voeghen,

 

Daer te stichten een Badt ter noot,

 

Ons te wassen van sonden,

 

Te verdrincken de bitter Doot

 

Door zijns selfs bloet end' Wonden,

 

T'niew' Leuen ons verbonden.

2

Soo hoort end' merct (O menschen al)
Wat Godt heet selfs de Doope,
Wat een Christen gheloouen sal,
Te mijden s'Ketters hoope:

Godt sprect end' wil dat t'Water sy,

Niet slecht Water alleyne,
Sijn Heylich woort is ooc daer by
Met rechten Gheest certeyne:
Dat is de dooper reyne.

3

Sulx heeft hy ons bewesen claer
Met Beelden end' met woorden,
Des Vaders stemm' men openbaer
Aende Iordane hoorden.

Hy sprac: dats de liue Soon' mijn,

Aen hem hebb' ic behaghen,
Dien latet v beuolen zijn,
Hoort hem in alle daghen,

[p. 51]

 

Wilt na zijn Leeringh' vraghen.

4

De Soon' Godts ooc hier selue staet
In zijnder menscheyt reyne,
De Heyl'ghe Gheest hem nederlaet
Ghelijc een Duyf' certeyne:

Op-dat wy souden twijff'len niet

Als wy de Doop' aenveyrden,
Door dese dry de Doop' gheschiet,
Op-dat sy hier op eyrden
By ons woonen met weyrden.

5

Christus heet zijn Iongh'ren daer-by:
Gaet all' de Werelt leeren
Datse verdoemt in sonden sy,
End' haer tot boet' soud' keeren:

Wie ghelooft, wort ghedoopt daer by,

Sal salicheyt verweruen,
Een nieuw' gheboren mensch' is hy,
Die niet meer en can steruen,
T'Hemel-rijck sal hy eruen.

6

Die niet ghelooft dees' weldaet groot,
Die blijft in zijnen sonden,
End' is verdoemt t'eewigher doot,
Diep inder Hellen gronden:

Niet en helpt eyghen heylicheyt,

Al zijn doen is verloren,
D'Eerf-sond' maect dat tot niticheyt,
Daer-in hy is gheboren.
Sijns selfs hulp' is verzworen.

7

Doogh' neemt alleen op t'water acht,
De menschen Water ghiten,
Het ghelooue verstaet de cracht

[p. 52]

 

Van Christus bloedich vliten:

 

End' is voor ons een roode vloet,

 

Van Christus bloet gheueruet,

 

Die alle schade heylen doet

 

Van Adam ons gheeruet,

 

Selfs ghedaen end' verweruet.