De Psalmen Dauids

Het Ghebet Christi: Math vi. D.M.L

1

ONse Vader in Hemelrijc,
Die ons heet kinders alghelijc,
End' wilt dat wy v bidden aen
Als wy met nooden

[p. 48]

 

zijn beuaen,

 

Gheeft dat niet bidd' alleen de mont,

 

Maer dat het gaet wt s'herten gront.

2

Gheheylicht uwen Name sy,
Oughevalscht blijf' ons v Woort by,
Dat wy ooc leuen Heylichlijc,
Na dijnen Name weyrdichlijc:
Bewaert ons Heer' voor valsche Leer',
Het arme veruoert volc bekeer.

3

V Rijc toecome wijt end' breyt,
End' ooc hier-na in Eewicheyt:
Gheeft dien Gheest die Christus toe-sey
Met zijn gauen menigherley:
Breect Satans toren end' ghewelt,
Voor hem uwe Kerk' vaste stelt.

4

Vwen will' gheschied' (Heer') ghelijc
Op aerden als in Hemelrijc,
Gheeft ons ghedult in lijdens pijn,
Ghehoorsaem in allen te zijn:
Weyrt end' keert allen vleesch end' bloet
Dat teghen uwen wille doet.

5

Gheeft ons heden ons dagh'lijcx broot,
End' wat-men behoeft tot lijfs noot:
Bewaert ons (Heer') voor twist end' strijt,
Voor siecten end' voor diren tijt,
Dat wy in goeden vrede staen,
Doet sorgh', ghiricheyt van ons gaen.

[p. 49]

6

All' onse schult vergheeft ons Heer',
Dat sy ons niet bedroeuen meer,
Soo wy ons' schuldenaers ghemeyn
Hun schult end' fout vergheuen reyn:
Hun te dinen maect ons bereyt
In rechterliefd' end' eenicheyt.

7

Leydt ons (Heer') in becoringh' niet,
Als ons de boose Gheest strijdt biet
Ter slincker oft ter rechter handt,
Helpt ons doen stercken wederstandt,
In vast Gheloof' end' onbevreest,
Door troost vanden heylighen Gheest.

8

Van alle quaet ons doch bevrijt
In dees' daghen end' boose tijt,
Verlost ons van d'eewighe Doot,
End' troost ons inden laesten noot,
Doet ons in t'eynd' goet onderstandt,
Neemt onse siel' in uwe Handt.

9

Amen, dat is: het werde waer,
Sterct ons ghelooue wanckelbaer,
Dat wy niet twijfelen daer aen
Wy en sullen all' dit ontfaen:
Op v woort inden Name // dijn
Soo spreken wy het Amen // fijn.