De Psalmen Dauids

Den cxix. Psalm.

[p. 34]

1

HEt zijn doch salich alle die
In t'recht ghelooue wand'len hier,
Inde wet Gods des Heeren:

Sy zijn ooc salich allegaer

Die zijn ghetuygh'nis houden claer,
En di hert'lijc begheren.
Want die tot quaet doen zijn gesint,
Die wandelen niet als Gods kint,
Op zijnen wech niet wachten:
Ach Heere God van hemelrijc,
Ghy hebt geboden vlijtelijc
Na v ghebodt te trachten.

2

O Godt, dat alle t'Leuen mijn
Ghestelt word' na t'behaghen dijn,
Om te houden v rechten,

Dan sal ic niet ter schanden gaen:

Wanneer ic vlijtich mercke aen
V Gheboden all' slechte,

Soo danck' ic v met hert'lijcheyt

[p. 35]

 

Der Rechten dijns Gherechticheyt,

 

Die ghy my leert met maten:

 

Want v recht wil ic houden wel,

 

Met dijn Genaed' comt tot my snel,

 

Wilt my niet heel verlaten.

3

Waer betert nv een Iongh'linx aert
Sijn wech? Dan als hy hem bewaert
Na uwen woorden allen:

Ick hebb' van ganscher herten vry

Ghesocht v Heer', en laet niet my
Van v Gheboden vallen:

Soo hebb' ic doch de Woorden dijn,

Verborghen in mijn Herte fijn,
Dat ic der sond' ontwenne.

Ghebenedijt ghy Heere groot,

Leert my door v Ghenade bloot,
Dat ick v rechten kenne.

4

Nv hebb' ick met de Lippen mijn
All' t'ghericht vanden Monde dijn
Bekent ende vercleret,

Inden wech dijns Ghetuygh'nis (Heer')

Met lust te wand'len hebb' ic meer
Dan den rijcdom begheret.

In v beuel spreck' ic alleyn,

Want s'menschen Ghebot is niet reyn,
Ick sie op uwen Pade,

Na dijne rechten lust my, siet,

V Woort wil ic vergheten niet,
Verleent my dijn Ghenade.6. Gloria.