De Psalmen Dauids

Den li. Psalm.

1

O Heer' Godt zijt genadich my,
Na dijn goetheyt ontfermt doch dy,
Doet wt mijn ouertreden,
Door v barmherticheden,
End' wascht my wel, o Heere Godt,
Van al mijne misdaden groot,
End' maect my reyn van sonden,
Daer ic in ben beuonden.
Ende mijn sonde staet voor my,
Ic heb alleen gesondicht dy,
Voor v hebb' ic boosheyt ghedaen,
In uwe Woort sult gy bestaen,
Soomen v recht versuket.

2

Siet, in boosheyt ben ic ghebracht,
Doen my mijn Moeder voort heeft bracht,
In sonden my ontfanghen,

Veel quaets heb ic beghanghen.

Maer tot de waerheyt lust v zeer,

[p. 19]

 

Ende ghy gaeft my ooc (O Heer')

 

V wijsheyt, sonder sorghen,

 

Die heym'lijc is verborghen.

 

Ontsondicht my met Ysop schoon,

 

Dat ic werd' reyn wascht my idoon

 

Sneew-wit, Ooc vreucht laet hooren my,

 

Dat de ghebeenten werden bly,

 

Die ghy soo hebt verslaghen.

3

Siet niet op mijnder sonden staet,
Maer doet wt alle mijn misdaet,
Heer, wilt doch in my maken

Een reyn Hert' na mijn haken.

Willighen Gheest vernieut in my,
Verworpt my ooc niet heel van dy,

Neemt niet den Heyl'ghen Gheeste

Van my, zijn ghenaed' meeste,
End' laet tot my we'er comen zeer

Den troost dijns Heyls, O Godt mijn Heer',

De vrye Gheest behoede my,
De boose wil ick leeren vry
Dijn wech: hun te bekeeren.

4

Vande bloetschulden my bevrijt,
Een Godt mijns salicheyts ghy zijt,
Dat mijn Tongh' spreck' met schalle

V Gherechticheyt alle.

Heere, doet op de lippen mijn,
Mijnen mondt maek' condt den Lof dijn,

D'Off'randen v mishaghen,

Anders woud' icks' v vraghen:
De Brand-offeren allegaer

En behaghen v niet voorwaer

[p. 20]

 

Sy zijn voor v ooghen een haet:

 

D'Off'randen Godts zijn met der daet

 

Eenen ghebroken Gheeste.

5

Een ghebroken, verslaghen hert'
Sult ghy niet worpen achterwert,
End' sult dat niet verachten,

Dat can ic wel betrachten.

O Heere Godt, doet Sion wel
Na dijnen will' end' goet beuel,

Ierusalem de Muren

Salmen weder op vuren,
Dan sult ghy hebben lust planteyt

Tot offer der Gherechticheyt,

Tot den brant-offer dijnen moet,
Dan salmen de Calueren goet
Op uwen Altaer legghen.