De Psalmen Dauids
(1583)–Willem van Haecht–
Auteursrechtvrij
[pagina 379]
| |
Is een dancsegginge voor de genade Gods, die hy ons door Christum bewijst, een eewich ghenaden-rijc oprecht, de sondaers in ghenaden aenneemt, in alle nooden onderhout, hun ghebet verhoort, ende alle de ghene die op hem betrouwen wel verlost. | |
1IC wil v, O mijn God, verhoogen,
Ghy Coninc: End' uwen naem,
Sal ic eewelijc lof verthooghen.
Daghelijx wil ic de faem
Ende den roem ws naems vermonden.
Groot en loflijc is de Heer':
Sijn grootheyt is niet om door-gronden,
Noch wt-sprek'lijc immermeer
| |
2Kindts Kind'ren sullen v werc prijsen,
End' van v ghewelt doen condt.
Ick wil spreken ende bewijsen
Van v Wond'ren t'aller stondt,
Van v Heerlijcke schoon Ciraten.
Dat-men Loflijck spreken sal
Van v daden groot bouenmaten,
End' mell' v Heerlijcheyt al.
| |
3Dat-men prijs' v groote goethede,
End' roem' v gherechticheyt.
| |
[pagina 380]
| |
Ghenadich, ontfarmherich mede,
Van grooter verduldicheyt
End' Goetheyt is Godt, t'elcx aenmercken.
Elck hy Goedertiren is,
End' ouer alle sijne Wercken
Ontfarmt hy hem heel ghewis.
| |
4All' v Werc sal uwen danck noemen,
End' v Heyl'ghen louen dy.
End' d'Eere dijns Coninc-rijcx roemen,
Van v Ghewelt spreken vry.
Dat den Kinderen al-te-male
Der menschen worde vertelt
Ws Coninc-rijcx heerlijken Prale,
Ende dijn zeer groot ghewelt.
| |
5V Rijck ende dijn Heerschappije
Heer', in-der eewicheyt duert.
All' die vallen staet de Heer' bije,
Die hy we'er op t'rechte vuert,
End' heft op die ne'er zijn gheslaghen.
Heer', alder Ooghen met vlijt
Verwachten op v t'allen daghen,
End' ghy spijst-se t'zijnder tijt.
| |
6Ghy doet v hant op, End' vult, Heere,
Met behaghen al wat leeft.
Godt is in all' zijn weghen zeere
Rechtveyrdich, vry onghesneeft:
End' Heylich zijn alle zijn wercken.
De Heer' is allen na-by
Die hem aen-roepen om verstercken,
All' die met ernst roepen vry.
| |
7Wat de Godt-vreesende begheren
| |
[pagina 381]
| |
Doet hy, hun roepen hy hoort,
End' sijn hulp' sy niet en ontberen.
Die hem bemint helpt hy voort,
Hy sal de God-loose vernilen.
Mijnen mont Godt louen sal:
Loeft zijnen Naem ghy alle Silen,
In eewicheyt ouer al.
|
|