De Psalmen Dauids

Den cxliij. Psalm.

Is een ghebet, dat Godt doch onse sonden vergeuen ons hert in bangicheyt vertroosten, na sijn woort ons leyden, ende alle valsche leeraers (die ons ergens anders dan op de genade Godts wijsen) keeren ende weeren wille.

1

O Heere, verhoort mijn Ghebet:
Wilt na mijn verlangen,
Mijn smeeken ontfangen,
Om v waerheyt will' onbesmet:
Ende wilt my verhooren mede,
Heer', om uwe Gherechtichede.

2

In het Ghericht doch niet meer en gaet

Nv noch nimmermeere

Met uwen knecht, Heere:

Want voor v en is, door sijn daet,
Gheen leuendich mensche rechtueyrdich:
Maer sy zijn al-ghelijck onweyrdich.

[p. 375]

3

Want de viant die vervolcht zeer
Mijn siel', Heer' verheuen // End' verslaet mijn leuen
Ter aerden: Hy leydt my (t'Oneer')
In het duyster, ghelijc de dooden
Ter Werelt, om my te benooden.

4

Daer-en-bouen is mijnen Gheest
In my t'allen dagen // Door dees' groote plagen,
Gansch beanxt ende zeer bevreest:
In mijn lijf is gheheel mijn Herte
Verteert, van benautheyt end' smerte.

5

Ick denck' op den voor-leden tijt:
End' spreck', wel beraden // Van v wonder-daden.
Ick streck' mijn Handen wt met vlijt
Tot v: Mijn siel', Heer', na v dorstet,
Als een Lant dat van droocht' vercorstet. Sela.

6

Heere, verhoort haestelijck my,
Mijnen gheest onmachtich // Die vergaet onsachtich
Bercht niet van my v aensicht bly,
Op dat ic niet en word' in allen,
Als die, die inde Cuylen vallen.

7

V ghenad' my vroech hooren doet,
Op v staet mijn hopen: // Doet my den wech open,
Daer-in dat ick wandelen moet,
Want my verlanght altijt ghestadich
Nae v, O mijn Heere ghenadich.

8

Heer', mijn vianden van my keert,
Hoedt my van hun-lieden // Tot v hebb' ic vlieden.
My doch na v behagen Leert,
Want ghy zijt mijn Godt: Leydt voort-ane
My door den gheest op effen bane.

9

Om ws naems wille, Heere groot,

[p. 376]

 

Wilt my doch verquicken: // Wilt oock dat beschicken

 

Dat mijn siel' werd' gheleyt wt noot,

 

Wt ancxt end' wt allen gheschille,

 

Om uwer Gherechticheyt wille.

10

Verstoort, verstroyt ende verspreyt
Ooc all' mijn vianden // Brengt-se doch ter schanden
Om uwe goedertierenheyt,
Vernielts' all' die mijn sile quellen,
Want ick ben v knecht: Wilt-se vellen.