De Psalmen Dauids

Den cxi. Psalm.

Is een dancsegginghe, om dat Godt in zijn Kercke zijn woort onderhout, den rechten Godts dienst daerinne ordonneert, ende soo getrouwelijc in allen noot zijn volc door Christum van sonden ende den doot verlost.

1

IC danck' van ganscher herten den Heere
By zijn volc in der vromen Raet.
Gods wercken zijn zeer groot van daet,
Wie haerder acht die bemintse zeere,
End' houdts' in Eere.

[p. 305]

2

Al wat Godt doet (ic moet het belijden)
Is loffelijc gheordonneert,
Sijn Heerlijcheyt niet en cesseert,
Sijn gherechticheyt duert t'allen tijden,

T'recht te bevrijden.

3

Hy heeft zijnder loffelijker daden
Ende wonderen, vry niet slecht,
Een ghedachteniss' opgherecht,
De barmhertighe Godt vol ghenaden,

Seer wel beraden.

4

De Heer' heeft een ghestadich ghedincken
In eewicheyt aen zijn verbont,
Die hem vreesen van herten gront
Die wil hy spijsen, end' daer toe schincken

Eten end' drincken.

5

Hy laet vercondighen daer-beneuen
Alle zijn gheweldighe daet,
De welk' hy zijn volc weten laet,
Dat hy hun vanden Heyd'nen soud' gheuen

D'Erue verheuen.

6

Sijns handen werc is recht end' waerhede,
Recht zijn zijn gheboden daer by.
Eewich worden gehouden sy,
Trouw'lijc end' red'lijc gheschi'en sy mede

Tot elker stede.

7

Hy seynt zijn volc verlossingh' bequame:
Dat zijn verbont in eewicheyt
Blijuen sal, heeft hy toe-gheseyt:
Heylich end' heerlijc is zijnen name,

In als lofsame.

8

De vrees' Godts is der wijsheyt beghinne.

[p. 306]

 

Sulx een zeer schoone cloecheyt is,

 

Diens lof blijft eeuwichlijc ghewis

 

Die daer na doet met hert' ende sinne,

 

End' blijft daer-inne.