De Psalmen Dauids

Den cx. Psalm.

[p. 303]

Is een prophetije van Christo, hoe dat hy Dauids Heere ende eewige God is, ende dat hy op het aertrijc door d'Euangelium een Kercke beghinnen, ooc eenen eewigen Prister zijn, t'volc gebenedijden, ende ouer alle zijne vianden regneren sal, ende al ist dat hy te voren moet gecruyst worden ende steruen, en sal nochtans inden doot niet blijuen.

1

DE Heer' sprac tot mijnen Heere:
Wilt v setten tot mijnder rechter-hant,
Tot dat ic legg' in oneere
V tot een schabelle uwen Viant.

2

De Heer' sal wt Sion seynden
Het Schepter van v Heerlijcheyt end' Rijc:
Heerschet eewich sonder eynden,
Onder uwe vianden al-ghelijc.

3

Na v winningh' sal gheuen
V dijn volc Offer in heylich Ciraet:
V Kind'ren worden daer neuen
V gheboren, als dan wt den dagh'raet.

4

De Heere die heeft ghesworen,
Ende het en sal hem berouwen niet:
Ghy zijt een Prister vercoren
Eewich na de wijs' Melchisedech, siet.

5

Tot uwer Rechterhant machtich
Sal Godt de Coninghen in stucken slaen,

[p. 304]

 

Ende vernilense crachtich,

 

Als den tijt zijns Torens sal comen aen.

6

Hy sal richten sonder letten
De heydenen, End' doen slachtingen groot:
Hy sal verslaen end' verpletten
Ouer geheel groote landen het Hoot.

7

Vander Beken op-den weghe
Sal hy drincken met benautheden swaer,
Daeromme sal hy te deghe
Hooch weder opheffen het hooft voorwaer.