De Psalmen Dauids

Den xcix. Psalm.

Is een vermaninge hoe wy God behooren te danken, dat hy zijn woort, ende rechten Gotsdienst onderhout, al ist dat de werelt die beyde vyant is, ende daer teghen woedt en raest.

1

DE Heer' is Coninc sterc ende machtich
Daerom rasen de Volken voorwaer.

[p. 267]

 

Hy sit op Cherubin hooch warachtich,

 

Daeromme beweecht de Werelt haer.

2

De Heer' is tot Sion groot beuonden,
Ouer alle Volken hooch ghewis.
Men dancke uwen naem t'allen stonden,
Die zeer wonderlijc, end' heylich is.

3

T'recht heeftmen lief in des coninx rijke:
Rechtveyrdicheyt gheeft ghy Heere goet,
Ghy bestelt ooc ghericht van ghelijke,
End' gherechticheyt in Iacob vroet.

4

Verheft Godt den Heere, sonder laten,
Biddet ooc aen tot zijnder Voeten-banc:
Want hy is zeer Heylich bouen maten:
Neemt altijt tot hemwaerts uwen ganc.

5

Moyses, A'ron met zijn Pristers willich,
Samuel met dien, die zijnen naem
Aenroepen: Sy schreydden tot Godt, billich,
Ende hy verhoordese bequaem.

6

Door eender Wolken-columne claerlijc
Sprac de Heer' met hun van bouen af:
Sy hilen zijn ghetuygheniss' waerlijc,
Ooc de gheboden, die hy hun gaf.

7

Heer', ghy zijt onse Godt hooch verheuen,
Ghy verhoordese vroech ende laet:
Ghy Godt, hebbet hun alles vergheuen,
End' straftese doen om hun misdaet.

8

Willet den Heer' onsen Godt verhooghen,

[p. 268]

 

Tot zijnen Heylighen berch wilt zeer

 

(Om hem aen te bidden) v all' pooghen:

 

Want zeer heylich is Godt onse Heer'.