De Psalmen Dauids

[p. 265]

Den xcviij. Psalm.

Is een prophetie van het Rijc Christi, in het welcke Got, door zijn Euangelium, zijn salicheyt laet vercondighen, zijn rechtveyrdicheyt openbaren, ende ons daerom vermanen, dat wy Godt voor alsulken ghenade dancken souden.

1

DEn Heer' een nieu Liet singt,
Want hy doet wonder bouen wonder:
Sijn Rechte-hant bedwingt,
Sijnen heylighen Arm brengt t'onder:
Crachtich hijt al verdringt.

2

De Heer laet met der daet
Sijn Heyl condt doen ende verclaren,

Voor den Volken hy laet

Sijn gherechticheyt openbaren:

Met alle zijn weldaet.

3

Hy ghedenct met der spoet
Aen zijn ghenaed' ende waerhede,

Den Huys' Israels vroet:

Alder Werelt eynden sien mede

T'Heyl onses Godts zeer goet.

4

Iuychet doch Godt den Heer'
Alle werelt: singt, roemt, wilt louen.

Loeft Godt met Harpen zeer,

Herpen end' Psalmen daer-en-bouen

Ghebruyct tot zijnder eer'.

[p. 266]

5

Met Trompetten gheclanc
End' Basuynen luyd' opghegheuen,

Voor Godt den Coninc vranc

Iuychet vrymoedich sonder sneuen,

Allen v leuen lanc.

6

De Zee bruysch' met gheschal,
End' wat hem daer in doet verthoonen:

Ooc den aert-bodem al,

Ende de gheen' die daer op woonen,

Doet sulx in groot ghetal.

7

Dat water-stroomen claer
Ooc vrolijc zijn tot allen tijden,

Ende dat allegaer

De berghen hun gheheel verblijden,

Sonder eenich beswaer.

8

Voor den Heere: want hy
Comt om te richten het Aertrijke:

Hy sal d'aerd' richten vry

Met gherechticheyt: Van ghelijke

Met recht all' t'volc daer by.