De Psalmen Dauids

Den xcvij. Psalm.

Is een prophetije van t'Rijc Christi, dat hy door t'Euangelie de geheele werelt ordeelen, ende der gheloouigen sonden vergeuen sal, met een vermaninge, ist dat wy ons van sonden wachten, so sal ons God voor onse Vianden wel beschudden.

1

DE Heer' is Coninc, dies werd' bly
T'Aertrijc, all' d'Eylanden daer by.
Om hem zijn wolken end' donckerhede,
Gherechticheyt, groot end' Ordeel mede
Is beuestinge (geheel openbaer)
Sijnes stoels voorwaer.

2

Een groot vier voor hem henen gaet,
Hetwelc steect aen, ende verslaet

Ront-om zijn Vianden all' ghelijke.

Sijn Blixemen lichten op t'Aertrijke:
D'Aerde siet het, ende sy verschrict haer,

Als zijt wort ghewaer.

[p. 264]

3

Berghen versmelten als t'Was doet:
Voor den Heer', voor den Heerscher goet

Des ganschen Aertbodems, wijt in t'ronden.

Des Heeren gherechtichticheyt oorconden
De Hemelen: End' alle volken sien

Hem eere gheschien.

4

Schamen moetens' hun alle-gaer
Die dinen den Beelden onclaer,

End' ooc alle die hun sonder schroemen

Daghelijcx der Af-goden beroemen:
Ghy alle Goden, biddet hem doch aen,

Willet tot hem gaen.

5

Sion hoordet, end' is verheucht:
De dochters Iuda maken vreucht,

End' zijn bly in v Regiment, Heere.

Want ghy zijt d'Alderhoochste (vol Eere)
In alle Landt Ouer de Goden wijt

Ghy zeer verhoocht zijt.

6

Ghy alle die den Heer' bemint,
T'Boose te haten zijt ghesint:

De Heer' neemt de silen in bewaren

Aller zijnder heylighen dinaren,
Vande handen hyse verlossen sal

Der Godtloosen al.

7

Het licht den rechtueyrdighen goet
Altoos wederom opgaen moet,

Ende Vreucht den herten vroem end' reyne.

Ghy rechtveyrdighe groot ende cleyne
Verheucht v des Heeren, hem danc bewijst,

Sijn Heylicheyt prijst.