De Psalmen Dauids

Den xcvi. Psalm.

Is een prophetie van het Rijc Christi.

1

SIngt den Heer' een nieu liet bequaem:
Alle werelt den Heer' singe.
Singt den heer' en loeft zijnen naem:
predict zijn heyl sunderlinghe
Van eenen tot den andren dach.
Onder de heyd'nen maect gewach,
En wilt zijn eer daer vertellen:
Al t'volc zijn wond'ren wilt mellen.

2

Want Godt is groot end' hooch lofbaer,
Wonderlijc ende zeer crachtich
Ouer alle Goden voorwaer.
Want alle Goden onmachtich

Vanden volken Afgoden zijn:

Maer de Heer' heeft gheschapen fijn,
Ende ghemaect zeer heerlijke
Den Hemel end' het Aertrijke.

3

Voor hem het zeer hoochlijc staet:
Gheweldich, lof'lijc end' prachtich
Het in zijn heylichdom toe-gaet.

[p. 262]

 

Alle ghy volken, eendrachtich

 

Brengt herwaerts den Heer' vroech end' laet,

 

Spoeyt v, wilt comen met der daet,

 

Brenghet doch herwaerts den Heere

 

Sijn groote macht, prijs end' eere.

4

Den Heere herwaerts d'Eere // brengt
Van zijnen name daer bouen:
Gheschenken euen zeere // brengt,
Ende comt in zijn voorhouen.

Biddet doch all' den Heere saen

In heylighe ciragy' aen:
Hem vrees' van ganschen ghedachten
Alle des Werelts gheslachten.

5

Seght onder de Heydenen vry,
Ende by hun doch verbreydet
Als dat de Heere Coninc sy
End' hebbe zijn Rijc bereydet

Soo wijt de gansche werelt is,

Dat het sal blijuen heel ghewis:
End' hy ordeelt recht de volken,
Onder all' des Hemels wolken.

6

Den Hemel hem verheughe wel,
End' heel vrolijc sy d'Eyrde:
De Zee bruysche met blijschap snel,
End' wat daer in is, met weyrde.

Het Velt sy vrolijc met gheschal,

Ende wat daer ooc op is al:
End' laet alle Boomen roemen
In het Wout, ooc cruyt end' bloemen.

7

Voor den Heere, want hy comt doch,
Want de Heere comt zeer spoedich,

[p. 263]

 

Om het aertrijc te richten noch.

 

Hy sal voorwaer heel saechtmoedich

 

Den aertbodem (wijt wtghespreyt)

 

Ordeelen met gherechticheyt

 

End' alle de Volken mede,

 

Met zijn waerheyt, t'elker stede.