De Psalmen Dauids

Den xci. Psalm.

Is een vertroostinghe, by aldien wy op Godt betrouwen, ende ons vastelijc aen zijn woort houden, ende dat wy in allerhande Noot hem aenroepen, dat hy ons dan genadelijc beschudden ende eyndelijc ooc salich maken sal.

Den sesten Toon.

1

VVie onder de bescherminghe goet
Des Hoochsten sit, ende blijft warachtich
Onder de schaduwe by t'behoet
Des Almachtighen heel welbedachtich.
Die sprect totten Heer': mijn toeuerlaet,
Mijn borcht, mijn Godt daer mijn hoep op staet.
Want hy vrijt my van s'Iagers stric (ten besten)
Ende vander zeer schadelijker Pesten.

2

Hy sal v met zijn Ved'ren altijt

[p. 252]

 

Bedecken, V toeuerlaet daernenen

 

Sal zijn onder zijn Vloghelen wijt,

 

Sijn waerheyt is scherm end' schilt verheuen.

 

Dat ghy s'nachts niet schrict voor grouwel fel,

 

Voor de Pijlen die s'daechs vlighen snel.

 

Voor de Pest' die in t'duyster sluypt om plagen:

 

Voor de siect' die verderft inde middaghen.

3

Ofter aen v zijde vallen (siet)
Duysent, ende thien duysent beneffen
Vwer rechter-handt in s'doots verdriet,
Soo en sal doch alsulcx v niet treffen.

Ia, ghy sult sien met v ooghen noch

Vwen lust: End' aenschouwen, hoet doch
Den Godloosen vergouden wort soo zeere:
Want v toevlucht end' opsien is de Heere.

4

V en sal ooc ghemoeten gheen quaet,
End' gheen plaeg' en sal v Hutten naken.
Want hy heeft beuolen met der daet
Sijn Enghelen van v end' v saken,

Dat op alle dijne weghen sy

V behoeden. Dat sy draghen dy
Op-de Handen, Ende dat ghy (tot weene)
V voeten niet en stoot aen eenen steene.

5

Op Leewen end' Ad'ren sult ghy gaen,
Met cracht op de ionghe Leewen treden,
End' op-de virighe Draken staen.
Hy begheret mijnder in waerheden,

Soo wil ic hem op het selue pas

Bystant doen end' hem wt helpen ras:
Hy kent zeer wel mijnen heerlijken name,
Daerom wil ic hem beschutten, ter vrame.

[p. 253]

6

Hy roep' my van herten aen altijt,
Soo wil ic hem als-dan ooc verhooren,
Siet, ic ben by hem met alder vlijt
Inder noot, end' in all' zijn verstooren,

Daer wt soo wil ic hem trecken gaen,

Ende hem tot eeren maken saen.
Ic wil hem versaden met langhen leuen,
End' wil hem toonen mijn Heyl hooch verheuen.