De Psalmen Dauids

Den xcij. Psalm.

Is een vertroostinghe ende leere, dat Godt de Godloose heel te niete doen, maer dat hy de vrome spadelijc segenen sal, op dat de vrome noch aen hun eygen geluck, noch aen der anderen ongheluc, hun niet ergheren en souden.

1

DAt is een cost'lijc dinc, danken den Heer':
Vwen naem ghy Hoochste lof-singen.
V ghenade des morgens euen zeer,
Snachts v waerheyt tot kenniss' bringhen.
Op psalter ende de thien snaren,
Met spelen op de Harp' verclaren.

[p. 254]

2

Want Heere, ghy laet vrolijc singen my
End' vreucht bedrijuen van v werken:
Vwer handen gheschidenissen vry
Roem' ic (Heer') in des Werelts perken.
Hoe is v werc soo groot van machten?
Heer', soo zeer diep zijn v ghedachten.

3

Een dwaesachtichen gelooft dat niet ras,
End' een Sot alsulx niet en achtet.
De godloose groenen ghelijc het gras,
End' de quaetdoenders onbedachtet
Bloyen alle, tot dat sy worden
Eewelijc verdaen end' vertorden.

4

Maer ghy Heere God d'alderhoochste zijt,
End' blijft eewichlijc end' ghestadich.
Want siet, v Vianden breet ende wijt,
Heere siet, v vianden smadich
Sullen vergaen, quaetdoenders alle
Moeten verstroyt worden ten valle.

5

Maer mijnen Horen sal worden ghewis
Verhoocht ende geheel verheuen:
Ghelijc die van eenen Eenhoren is,
Ende vol vreuchden daer beneuen
Word' ic ooc ghesalft heel ghenadich
Met verscher Olien weldadich.

6

Darenbouen aen mijn vianden al
Sal mijn Oogh' haren lust aenschouwen,
Mijn Oore haren lust ooc hooren sal
Aen de boose gansch vol ontrouwen,
Die hun-liden teghen my setten:
Welk' ic noch all' sal sien verpletten.

7

De gherechte sal als een Palboom schoon

[p. 254[255]]

 

Groenen, end' als de Ceder hooghe

 

Op Libanon sal hy wassen idoon.

 

Die sullen groenen (met vertooghe)

 

In ons Godts voorhouen vol eeren,

 

Die gheplant zijn in t'huys des Heeren.

8

Al worden sy oudt, sy sullen dan noch
Bloeyen, vruchtbaer ende versch wesen.
Op dat sy vercondighen als dat doch
Soo heel vroom is de Heer' ghepresen,
Gansch mijnen troost tot allen stonden
Gheen onrecht is aen hem beuonden.