De Psalmen Dauids

[p. 236]

Den lxxxvi. Psalm.

Is een ghebet dat Godt door sijnen heyligen Gheest, ons in zijn vreese onderhouden, ons leeren, ende voor alle vyanden bewaren wille.

1

HEer' neycht v ooren, End' my verhoort:
Want ic ben ellendich end' arm.
Bewaert mijn Sile, Want rechtevoort
ben ic heilich: Geeft my bescharm
Helpt gy o mijn Godt dijnen knecht nv,
Die hem gheheelijken op v verlaet.
Heer' zijt my ghenadich: want tot v
Godt ic dagelijx roepe metter daet.

2

Verheucht de sile dijns Knechts: want Heer'
Na v hertelijc verlangt my.
Want ghy zijt goet end' ghenadich seer,
Van grooter goetheyt dien, die dy

Aenroepen. Verneemt mijn Ghebet saen,

[p. 237]

 

End' merct op de stem mijns smeekens met vlijt.

 

Heer', inder noot soo roep' ic v aen,

 

Wilt my doch verhooren tot deser tijt.

3

Heer, onder de Goden nimant is
V ghelijc, Ooc is nimant daer
Die soo doen can ghelijc ghy ghewis.
Alle Heyd'nen die ghy voorwaer

Ghemaect hebt, sullen comen met spoet,

Aenbidden v, end' eeren uwen naem.
Dat ghy soo groot zijt, end' wonder doet,
End' alleene Godt zijt, een Heer' lof-saem.

4

Wijst my Heer' uwen wech, dat ic noch
In uwe waerheyt wand'le bloot,
Houdt mijn hert' byden eenighen doch,
Dat ic vreese dijnen naem groot.

Ic dank' v Godt: End' loef eewich vry

Vwen naem. Want v goetheyt t'alder stondt
Ouer my groot is: Mijn siel' hebt ghy
Ooc verlost wt der hellen dipen grondt.

5

Teghen my setten de stoute haer,
End' den hoop der Tyrannen staet
My na mijn siel', end' en hebben claer
V niet voor ooghen vroech noch laet.

Maer ghy Heere Godt barmhertich zijt,

Ende ghenadich geheel bouen maet,
Verduldich zijt ghy tot alder tijt,
Van grooter goetheyt end' trou metter daet.

6

Keert v tot my, zijt ghenadich nou,
Sterct uwen knecht met dijner macht,
End' helpt den Soon uwer maert' wt rou.
Doet een teeken aen my met cracht,

[p. 238]

 

Op dat het my, O Heere, wel gha:

 

Dat het sien alle die daer haten my,

 

End' hun schamen moeten voor end' na,

 

Als dat ghy Heer' my troost, ende staet by.