De Psalmen Dauids

Den lxxxiij. Psalm.

Is een ghebedt voor de Christelijke Kercke, ende tegen alle hare vianden.

1

GOdt, en zwijghet doch alsoo niet,
End' en zijt doch niet stil alsoo zeere,
En houdet ooc niet soo inne Heere
Want v Vianden rasen siet,
End' die v haten met valsch betichten,
De selue den Cop moedich oprichten.

2

Teghen v verborghene sy
Houden raet, end' maken t'allen daghen
Listighe teghen dijn volc aenslaghen
Wel aen, segghen sy, laets' ons vry
Wech doen, datse geen volc en zijn machtich:
Dat Isr'els naem niet meer word' gedachtich,

[p. 231]

3

Want vereenicht hebben sy haer
T'samen, end' hun teghen v verbonden.
Ende de Hutten tot allen stonden
Der Edomiten openbaer
Sijn teghen v, End' d'Ismaeliten:
Der Moabiten end' Hagariten.

4

Der Gebaliten, Ammon saen,
End' Amalekiten ter (onvramen)
Philistijns met die te Tyro t'samen.
Assur heeft ooc t'selue ghedaen,
De welke hem tot hun heeft ghegheuen,
End' helpt de Kind'ren Lots daerbeneuen. Sela.

5

Als Madianiten hun doet,
Als Sissera, Iabin ooc ghelijke,
Aen de beke Kison, dat het blijke.
Die verdaen werden metter spoet
By Endor in seer groot onweyrden,
Ende werden all' tot drec op Eyrden.

6

Maect hun Vorsten, ghelijc daer is
Oreb ende Seeb, tot oneere:
All' hun Ouersten, als Seba Heere,
End' ghelijc Salmuna ghewis.
Die daer segghen: Wy willen versmadich
De Huysen Godts innemen handadich.

7

Als eenen dray-wint maectse doch,
Als Stoppelen voor Wint onghestadich
Als een vier t'wout verbrant onghenadich,
Ende laetse, Heer', worden noch
Gansch ghelijc een vlamm' aensteect (tot sneuen)
De Berghen, Hoe hooch sy zijn verheuen.

8

Alsoo met uwen Weder fel

[p. 232]

 

Vervolchtse doch, end' brengse ter neder,

 

End' verschrictse met uwen onweder.

 

Maect hun aensicht vol schanden snel,

 

Op dat sy (sonder eenich vertraghen)

 

Moeten altijt na uwen naem' vraghen.

9

Schamen moeten hun alle sy,
End' altoos verschricken meer end' meere,
Ia, te schand' worden end' vergaen seere.
Soo sullen sy kennen, dat ghy
Met uwen Name heet Heer' alleene,
De hoochst' in alle Werelt ghemeene.