De Psalmen Dauids

Den lxvi. Psalm.

Is een dancsegghinghe, dat Godt soo wonderlijc verlost in allen nooden helpt, ende dat, voornemelijc als hy t'ghebet verhoort.

[p. 176]

1

IVychet den Heer' alle Landen,
Lofsinget ter eeren zijnen naem,
roemt hem heerlijc met verstanden,
Sprect tot God: hoe wonderlijc bequaem
Sijn al v werken // Hier in t'aenmerken?
Het sal uwe Vianden veracht
Gheheel falieren // Tot diep verneren,
O Heere, voor uwe groote macht.

2

Elc Lantschap Heer', v lofsinghe,
End' aenbidde dijnen Name goet. Sela.
Comt herwaerts, siet sonderlinghe
Godts wercken, die soo wonderlijc doet

Onder de menschen // Na all' hun wenschen.

Hy maect de zee drooghe, datmen vry
Daer op can stane // End' te voet gane:

[p. 177]

 

Dies zijn wy in hem verheucht end' bly.

3

Hy heerschapt eewich met machten,
Sijn Oogh' op alle volcken aenschout:
D'afuallighe met gheen crachten
En connen hun niet verhooghen stout. Sela.

Louet ghy Volken // Laet door de wolken

Den lof onses Godts worden luydtbaer.
Die onse Silen // Niet laet vernilen,
End' neemt den ganck onser voeten waer.

4

Want Godt ghy hebt ons in t'proeuen:
Gheloutert, ghelijc siluer end' Gout.
Ghy hebt ons met veel bedroeuen
Ooc laten worpen zeer menichvout

Heer', inden Toren // By-na verloren,

Ghy hebt ooc op ons lendenen cranc
Gheleyt onsachtich // End' welbedachtich
Eenen last, end' een zeer groot bedwanc.

5

Ghy hebt menschen comen laten
Ouer ons hooft: In water wy zijn
End' dier comen, als verwaten:
Maer we'er wtgheuoert hebt ghy ons fijn,

End' ghemaect blijde // Daerom by tijde

Wil ick vlytich met Brant-offer gaen
In v Huys Heere // end' haesten zeere
Mijn gheloften te betalen saen.

6

Ghelijc als ick heb' ontloken
Mijn lippen, Ende soo mijnen mont
Heeft in mijnen noot ghesproken.
Vette Brant-offeren t'alder stont,
O Godt verheuen // Wil ic v gheuen
Van ghebrande Hammen: Ick wil daer

[p. 178]

 

Offeren spoedich // Bocken vrymoedich

 

Met Runderen op uwen Altaer. Sela.

7

Comt herwaerts, hoort na mijn mellen,
Ghy alle die Godt vreest, wilt verstaen:
Ic wil v claerlijc vertellen
Wat hy aen mijn siel' heeft ghedaen.

Ic niet en beydde // Maer riep end' schreydde

Met mijnen monde vry onuerstoort,
Ic gonck hem prijsen // End' Eer' bewijsen
Met mijnder tonghen soot wel behoort.

8

Waert dat ic hadde ghenomen
In mijnder herten wat onrechts voor:
Soo en soud' de Heer' volcomen
My gheensins gheuen eenich ghehoor.

Daerom in Eere // Mijn smeeken teere

Verhoort Godt. Sijnen Lof sy vermeert,
Die met Waerheden // Hoort mijn ghebeden,
End' zijn goetheyt niet van my en keert.