De Psalmen Dauids

Den xlv. Psalm.

Is een Prophetie van het rijke Christi, ende van de Christe-

[p. 126]

lijke Kerke, datse de ongheloouige Ioden sullen laten varen, ende hun des troosten, dat de Heydenen met groote hoopen daer toe comen sullen.

1

MIjn herte dicht // (T'welc my verlicht.)
Een seer fijn Liet: Ic will singhen
Van een Coninc // Een heerlijc dinc:
Mijn tongh' die is in t'volbringhen
Een Penne van een goet schrijuent,
Wat sy spreect dat is haer bekent
Door den Heere sonderlinghen

2

Voorwaer ghy zijt // De schoonste wijt
Onder de Menschen kinderen:
V lippen, Heer' // Sijn lieflijc seer.
Daerom (sonder verminderen)

Seghent v Godt in Eewicheyt.

Gort dijn sweyrt aen v sijd' bereyt,
Ciert v helt, sonder hinderen,

3

Het moet vry al // T'uwen gheual
In v Ciragie schoone
Ghelucken v // Trect henen nv

[p. 127]

 

De waerheyt selfs in persoone

 

Te goet, End' dat ghy d'Arme vry

 

By t'recht behout: wonder daer by

 

Sal doen v Handt met verthoone.

4

V Pijlen fel // Sijn scherp end' snel
Soo dat het volc valt onsachtich
Voor v (O Godt) // Onder (tot spot)
Des Conincx Vyanden crachtich.

Godt, uwen Stoel eewelijc blijft:

De Schepter uwes Rijcx beclijft,
Hy is oprecht ende crachtich.

5

Heer', ghy bemint // (Soomen beuint)
De Gherechticheyt: end' t'wesen
T'welc godloos is // Haet ghy ghewis:
De Heere dijn Godt (midts desen)

Die heeft v Godt ghesalft tot Eer'

Met Vreuchden-olie, veel-meer
Dan v ghesellen ghepresen.

6

V cleed'ren reyn // Die zijn certeyn
Enkel Myrrhe, soot can blijken:
Aloes goet, Kezia soet
Sijn sy oock te verghelijken,

Als ghy henen treedt wt den Choor,

Wt v pallaysen van yuoor
In v Heerlijcheyt end' Rijken.

7

In v Ciraet // Gaen vroech end' laet
Coninghen Dochters verheuen:
De Bruyt die staet // Ooc met der daet
Vwer rechter Handt beneuen,

Sy is verciert met schoonheyt groot

In costelijken Goude root,

[p. 128]

 

Seer veel goets is haer ghegheuen.

8

Ghy dochter hoort // Siet rechteuoort
Daer op, Neyght v Oor' by tijden:
Vergheet oock vry // Dijns volx daer by,
Ws vaders huys stelt besijden.

Soo heeft de Coninck lust aen dy:

Want hy is v Heer', ende ghy
Sult hem bidden sonder mijden.

9

Van Tyrus wijt // Sal ooc met vlijt
De dochter gheschencken draghen:
De rijke vroet // Sullen met spoet
Voor v smeeken in dien daghen:

Des Conincx dochter heerlijc is

Inwendich: S'is becleet ghewis
Met veel gouts-werck, tot behaghen.

10

In cleed'ren schoon // Ghesticht ten thoon
Tot desen Coninck der eeren
Leydt-mense daer. // Men brenght oock naer
Tot v (om dijns lofs vermeeren)

Alle haer speel-ghenooten saen,

De maechdekens die haer na gaen
Tot v haer all-ghelijck keeren.

11

Men leydt-se (siet) // Tot vreuchts geniet,
End' gaen verblijt met gheschalle
(Sonder abuys) // In s'Conincx huys.
Ghy sult kind'ren crijghen alle

Int sted' uwer Vaderen goet:

End' setten die tot Vorsten vroet
Ter werelt, t'uwen gheualle.

12

Ick wil voorwaer // Ws naems lofbaer
Heer', altijt wesen indachtich,

[p. 129]

 

End' zijn ghesindt // Van kindes kindt

 

Dien te ghedencken warachtich:

 

Daerom sullen de Volken ou

 

Altoos dancken in vreucht end' Rou,

 

End' eewelijc louen crachtich.