De Psalmen Dauids

Den xxxij. Psalm.

Is een leeringe vande verghiffenisse der sonden, ooc dat wy onse sondige nature ende misdaet bekennen, Godt om ghenade bidden ende vergheuinghe door Christum hopen souden.

1

VVel den mensche, dien zijn mis daet
Dien bedeckt is zijn sonde quaet.
Gheheelijck is vergheuen:
Salich is hy daerneuen,
Dien

[p. 87]

 

Godt niet telt // Rekent noch melt

 

Sijn misdaet end' zijn Sonden:

 

In welckens Gheest // Luttel noch meest

 

Valscheyts en is beuonden.

2

Want doen ict te verswijghen dacht,
Soo versmachten mijn Beenen,
Door mijn huylen, t'welck dagh'lijx placht
Mijn crachten te vercleenen.

Want u Handt was // Swaer op dat pas

Dach en d'Nacht op my Heere,
Het sap daer by // Wert dorr' in my,
Ghelijct Somers droocht zeere. Sela.

3

Dies bekenn' ic, end' niet en swijgh',
V mijn sond', end' boosheden.
Ic sprac: (waer door ic troost vercrijgh')
Den Heer' mijn Ouertreden

Wil ic doen cont // Wt s'hertzen gront

Nv, end' tot allen stonden:
Doen verghaeft ghy // (Dies ic werd' bly)
De misdaet mijnder Sonden. Sela.

4

Daer voor sullen sonder respijt
Alle Heylighen moedich
V aenbidden ter rechter tijt:

[p. 88]

 

Daerom, als ouervloedich,

 

Wateren groot // Comen ter noot,

 

En sullen sy niet naken

 

Aen sulck gheslacht: // Godt daer op acht,

 

Gheen leet en sal hun raken.

5

Ghy zijt ooc mijn bewaerder // noch,
Wilt my voor anxt behoeden,
O Heere, comt my naerder // doch,
Mijn Ellend' wilt bevroeden,

Op-dat ic dan // V roemen can

Heel vrolijc, Heer' ghepresen,
Sijnde bevrijt // Door v met vlijt,
Verlost ende ghenesen.

6

V recht ick onderrichten // wil,
Tot de Waerheyt bekeeren:
Mijn Paden ic verlichten // wil,
Den rechten wech v leeren,

Dien ghy voordaen // Sult wand'len gaen

Ic wil v met mijn Ooghen
Oock leyden wel // In t'recht beuel,
Daer sult ghy v na booghen.

7

Niet als Peerden end' Muylen zijt,
Die niet en zijn in t'wesen
Verstandich, Welcke men berijt
Met eenen Toom (midts desen)

T'ghebidt men moet // (T'welc moeyte doet)

Ooc legghen inden monde,
Wanneer sy niet // Na v ghebiet
En doen tot elker stonde.

8

De Godloose veel plaghen heeft:
Maer wie hoept op den Heere,

[p. 89]

 

De self' in zijne daghen // leeft

 

Met deucht omvangen zeere.

 

Verheucht v vry // Des Heeren ghy

 

Altijt rechtveyrdigh' alle.

 

Ghy vrome goet // Al sulcx ooc doet,

 

Roemt hem met groot gheschalle. 2. Gloria.