De Psalmen Dauids

Den xxix. Psalm.

Is een prophetie, dat Christus door sijn Euangelium ouer de geheele Werelt regeren, ghetoyt maken ende alle t'ghene dat hem teghen is in stucken breken, ende de heylige Doope insetten sal.

1

BRenghet herwaerts den Heere // ghy
Gheweldighe wilt brenghen
Herwaerts, stercheyt end' eere // vry
Brengt herwaerts, wilt gehengen
D'eere zijns Naems wel gemaniert:
Bidt aen met heylicheyt verciert
Den Heer', sonder verlengen.

2

Godts stemm' op-de wateren gaet:
T'dondert de Heer' der eeren:
Op groote Wateren Godt staet.
Macht heeft de stemm' des Heeren:

Godts stemme die gaet heerlijc voort.

[p. 79]

 

Nerghens en is sy onghehoort,

 

Ia, sy cant all' omkeeren.

3

Des Heeren stemme'in stucken slaet
End' sy velt heel daer neder
De Ceder-boomen met der daet:
De Heer' breect met onweder

End' vernielt ouer al in t'lant

Op Libanon den berch gheplant
Snellijc den hooghen Ceder.

4

End' doetse springhen metter spoet
(Al door zijn stemme crachtich)
Ghelijc een seer ionck Ree-calf doet:
Oock Libanon warachtich,

End' Syrion de berghen hooch

Als iong' Eenhoornen (met vertooch)
Doet hy springhen onsachtich.

5

Godts stemm' als vier-vlammen doorhout.
De stemm' Godts can beweghen
De woestijn: End' van Kades t'wout
End' sy beroert te deghen

De Hinden: de Bosschen sy bloot:

Elc sal hem segghen Eere groot
In zijn huys onuersleghen.

6

Eenen Sin-vloet te rechten aen
Sidt Godt de Heer' verheuen:
Ende sijn Conincrijc blijft staen
Eewelijck sonder sneuen.

De Heer' sal sijn volck gheuen cracht:

Hy salse seghenen met macht
End' sijnen vrede gheuen. 1. Gloria.